فۋتبولدان قازاقستان چەمپيوناتىنىڭ جەتىنشى تۋر ويىندارى اياقتالدى.
ەكى كۇنگە جالعاسقان كەزەكتى تۋر باسەكەلەرى ادەتتەگىدەي تارتىستى ءوتتى. چەمپيوندىق اتاق ءۇشىن تالاسىپ جاتقان «استانا» ەلوردادا «شاحتەردى» جەڭىپ, تۋرنير كەستەسىندە كوش باستاسا, «قايرات» سىرت الاڭدا «اتىراۋدان» جەڭىلىپ, ۇزدىكتەر قاتارىنان شىعىپ قالدى.
جەتىنشى تۋرعا جوسپارلانعان جەتى ماتچقا جەكە-جەكە توقتالار بولساق, تۋردىڭ سەنساتسياسى اتىراۋدا تىركەلدى. بيىل عانا ءبىرىنشى ليگادان جوعارى توپقا ورالعان «اتىراۋ» ءوز الاڭىندا بىلتىرعى ەل چەمپيوندارى – الماتىنىڭ «قايراتىن» قابىلداپ, 1:0 ەسەبىمەن جەڭىپ كەتتى. جەرگىلىكتى «مۇنايشى» ستاديونىندا وتكەن كەزدەسۋدە «اتىراۋ» ويىنشىلارى قارسىلاستارىنا قاراعاندا ايتارلىقتاي باسىمدىققا يە بولدى دەپ ايتا المايمىز. تەك ەكىنشى تايمنىڭ العاشقى مينۋتتارىنداعى «قايراتتىڭ» قورعانىستاعى قاتەلىگىن ءتيىمدى پايدالاندى. ماتچتاعى جالعىز ءارى جەڭىستى گولدى «اتىراۋدىڭ» جارتىلاي قورعاۋشىسى جاسلان قايىركەنوۆ سوقتى. چەمپيوناتتاعى ءتورت جەڭىلىس, ەكى تەڭ ويىننان كەيىنگى العاشقى جەڭىسىنە قول جەتكىزگەن ارام ۆوسكانياننىڭ شاكىرتتەرى تۋرنير كەستەسىندەگى جاعدايىن ءبىرشاما جاقسارتىپ الدى. «اتىراۋ» ويىنشىلارى كەيىنگى تۋرلاردا ءتاۋىر ونەر كورسەتىپ كەلەدى. الدىمەن ءوز جەرىندە «جەتىسۋمەن» تەڭ تۇسسە (2:2), كەيىن سىرت الاڭدا «قايسارمەن» (1:1) ۇپاي ءبولىستى. ال جەتىنشى تۋردا سەنساتسيا جاساپ, «قايراتتى» الماتىعا ۇپايسىز قايتاردى.
«اتىراۋ» – «قايرات» اراسىنداعى ماتچتىڭ ستسەناريىنە ۇقساس ويىن اقتاۋدا «كاسپي» مەن «تاراز» كلۋبتارى اراسىندا ءوتتى. التى تۋردان بەرى بىردە-ءبىر ويىندا جەڭىلمەي, تۋرنير كەستەسىندە «استانامەن» بىرگە توپ باستاپ كەلگەن «تارازدىڭ» جەڭىستى سەرياسىنا مۇنايلى ولكەدە نۇكتە قويىلدى. ويىن تاعدىرىن 30-مينۋتتا «تاراز» قاقپاسىنا بەلگىلەنگەن 11 مەترلىك ايىپ دوبى شەشىپ كەتتى. بۇل مۇمكىندىكتى ءمۇلت جىبەرمەگەن «كاسپيدىڭ» جارتىلاي قورعاۋشىسى ۋادجدي سالي كومانداسىنا ءۇش ۇپاي سىيلادى.
ازىرشە ءوز الاڭىنداعى ويىنداردى ەلورداداعى «استانا ارەنادا» وتكىزۋگە ءماجبۇر بولعان قاراعاندىنىڭ «شاحتەرى» بۇل تۋردا ستاديوننىڭ نەگىزگى قوجايىندارى – «استانانى» قابىلدادى. چەمپيوناتتىڭ العاشقى ءتورت تۋرىنان كەيىن باپكەر اۋىستىرىپ, ويىن مانەرىن وزگەرتكەن «كەنشىلەر» كومانداسىنا بۇل وزگەرىس وڭ اسەرىن تيگىزىپ جاتىر. رەسەيلىك مامان ماگومەد اديەۆ كلۋب تىزگىنىن ۇستاعان العاشقى ويىندا «شاحتەر» سىرت الاڭدا «اقتوبەنى» 3:0 ەسەبىمەن جەڭسە, كەشەگى تۋردا 1:0 ەسەبىمەن «استانادان» جەڭىلدى. ويىنداعى جالعىز گولدى «استانانىڭ» جارتىلاي قورعاۋشىسى ۆالەري چۋپەركا سوقتى. «شاحتەر» فۋتبولشىلارى ەسەپتى تەڭەستىرۋگە تىرىسقانىمەن, قاتارىنان ەكىنشى ويىندا جەڭىسكە جەتۋ باقىتى بۇيىرماعان ەكەن. مولدوۆالىق ويىنشى چەمپيوناتتاعى العاشقى گولىن سوعىپ قانا قويماي, «استاناعا» تۋرنير كەستەسىندە جەكە-دارا كوش باستايتىن مۇمكىندىك سىيلادى.
بيىلعى سۋپەركۋبوكتى جەڭىپ, ماۋسىمدى تاماشا باستاعان قوستانايدىڭ «توبىلى» تۋرنير دەبيۋتانتى – «تۇرانمەن» كەزدەستى. «توبىل ارەنادا» وتكەن ويىندا الاڭ قوجايىندارى تۇركىستان كلۋبىنىڭ قاقپاسىنا جاۋاپسىز بەس گول سوعىپ, ءىرى ەسەپپەن جەڭىسكە جەتتى. ءبىرىنشى تايمدا نەمانيا نيكوليچ پەن ازات نۇرعاليەۆ مەرگەندىگىمەن كوزگە تۇسسە, ەكىنشى تايمدا نيكوليچ ءدۋبلدىڭ اۆتورى اتاندى. سونىمەن قاتار دميتري ميروشنيچەنكو مەن قوسالقى قۇرامنان شىققان جاسۇلان جۇماشەۆ ءبىر-ءبىر گول سوعىپ, ويىننىڭ نۇكتەسىن قويدى.
التىنشى تۋردا تالدىقورعانعا قوناققا بارىپ, «جەتىسۋ» قاقپاسىنا ءتورت گول سوققان شىمكەنتتىك كلۋب ءالى دە قاھارىنان قايتپاعانعا ۇقسايدى. بۇل جولى ءوز الاڭىندا «قايسار» كلۋبىن قابىلداعان «ورداباسى» قارسىلاستار قاقپاسىن ءتورت مارتە ءدال كوزدەدى. كەزدەسۋدىڭ ەسەبىن الاڭ قوجايىندارى اشقانىمەن, العاشقى تايمنىڭ سوڭىنا دەيىن «قاسقىرلار» ەكى گول سوعىپ تارازى باسىن وزدەرىنە اۋداردى. دەگەنمەن ەكىنشى تايمدا «ورداباسى» فۋتبولشىلارى ويىن تىزگىنىن قولدارىنا الىپ, «قايسار» قاقپاسىنا ءۇش گول سوقتى. ەكى تايمدا ءبىر-ءبىر گول سوققان برازيليالىق شابۋىلشى جواو پاۋلو ءدۋبلدىڭ اۆتورى اتانسا, قورعاۋشى تيمۋر دوسماعانبەتوۆ پەن پورتۋگاليالىق شابۋىلشى رۋبەن بريدجيدۋ دا قارسىلاستارىنىڭ قاقپاسىن ءبىر مارتەدەن ءدال كوزدەدى. ايتپاقشى, 2019 جىلدان بەرى «ورداباسىدا» ويناپ كەلە جاتقان جواو پاۋلو كەشەگى ماتچتان كەيىن كلۋب تاريحىنداعى ۇزدىك سۇرمەرگەن اتاندى – 33 گول.
ءبىر جىلدىق ۇزىلىستەن سوڭ پرەمەر-ليگاعا قايتا ورالعان «اقتوبە» ەكى تۋردان بەرى جەڭىسكە جەتە الماي كەلەدى. التىنشى تۋردا ءوز الاڭىندا «شاحتەردەن» 3:0 ەسەبىمەن وڭباي جەڭىلگەن الەكسەي باگا شاكىرتتەرى بۇل تۋردا ورالدىڭ «اقجايىق» كلۋبىنا 1:0 ەسەبىمەن جول بەردى. «اقتوبە» ويىننىڭ ءسوزسىز ءفاۆوريتى بولا تۇرا, ءۇش ۇپايىن ولجالاي المادى. ال پەتروپاۆلدىڭ «قىزىلجار» كومانداسى تالدىقورعاننىڭ «جەتىسۋىن» قابىلداپ, 3:0 ناتيجەسىمەن ايقىن جەڭىسكە جەتتى.
جەتىنشى تۋردان كەيىن سۇرمەرگەندەر كوشىن «ورداباسى» كلۋبىنىڭ شابۋىلشىسى جواو پاۋلو باستادى. ونىڭ ەنشىسىندە 6 گول بار. ال 4 گولدان سوققان ابزال بەيسەبەكوۆ, ابات ايىمبەتوۆ, مارين توماسوۆ («استانا»), كانتە («قايرات»), كاروليس لاۋكجەميس («قايسار») جانە پەدرۋ ەۋجەنيۋ («تاراز») ەكىنشى ورىندى ءبولىسىپ تۇر.