التاي كولگىنوۆ Instagram پاراقشاسىندا بيىل ەلوردادا ءبىر ملن-نان استام جاسىل جەلەك وتىرعىزۋ جوسپارلانعانىن ءمالىم ەتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«ماقساتىمىز - ەلوردانى ەكولوگيالىق تۇرعىدا قالا تۇرعىندارى ءۇشىن جاسىل ءارى جايلى ەتۋ! بيىل 1 ملن-نان استام جاسىل جەلەك (اعاشتار, بۇتالار, كوشەتتەر جانە ت. ب.) وتىرعىزۋدى جوسپارلاپ وتىرمىز. ەلوردانىڭ جاسىل بەلدەۋى دە, بارلىق اۋداندارى دا قامتىلماق. تەك ساياباق اۋماعىندا وتىرعىزىپ قانا قويماي, سونىمەن قاتار اۋلالاردا, ەلدى مەكەندەردە جانە كوگالداندىرۋ جەتكىلىكسىز جەرلەردە وتىرعىزامىز.
بۇگىن «بىرگە – تازا قازاقستان» ەكولوگيالىق ايلىعىنا قوشقارباەۆ كوشەسىندە (قورداي مەن تولەباەۆ كوشەلەرىنىڭ اراسىندا) اعاشتار وتىرعىزىلدى. سونىمەن قاتار ش.ايتماتوۆ كوشەسىندە اعاش وتىرعىزۋعا قاتىستىق. شاراعا جاستار, ەرىكتىلەر, «بولاشاق» قاۋىمداستىعىنىڭ مۇشەلەرى, قالا تۇرعىندارى قاتىستى. سونداي-اق قالادا كۇن سايىن ەلوردانى سانيتارلىق تازالاۋ جانە اباتتاندىرۋ جۇمىستارى جۇرگىزىلىپ جاتىر.
كورىكتى جەرلەرىمىزدىڭ اۋماعىندا جاسىل ارالدار پايدا بولادى. «استانا وپەرا» ماڭىنداعى اۋماقتا ەمەن باعى, ترياتلون ساياباعىندا مامىرگۇل باعى, «استانا بالەت» اۋماعىندا دا وزىندىك جاسىل باق بولادى. سونداي-اق پەداگوگتاردىڭ, دارىگەرلەر مەن قۇتقارۋشىلاردىڭ قۇرمەتىنە سكۆەرلەر اشىپ, ولاردى اباتتاندىرامىز.
وسىلايشا, ۋاقىت وتە كەلە بۇكىل قالا بويىنشا جاسىل ارالدار پايدا بولادى. جىلدان-جىلعا ەكولوگيالىق ايماقتار سانى ارتپاق. بىراق جاسىل كەڭىستىكتەرگە ءتيىستى كۇتىم قاجەت. وتكەن جىلى اعاشتاردى كەسۋ كەزىندە وتەمدىك وتىرعىزۋ ەكى ەسەگە ارتتى. ەگەر بۇرىن «بەسكە ءبىر» بولسا, قازىر «ونعا ءبىر».
قالانى جاپپاي كوگالداندىرۋ ەكولوگيانى جاقسارتۋعا جانە قالا تۇرعىندارىنىڭ ۋاقىتىن وتكىزۋگە ارنالعان ورىنداردى قۇرۋعا عانا ەمەس, سونىمەن قاتار قالانىڭ كليماتتىق جاعدايىن جۇمسارتۋعا مۇمكىندىك بەرەدى.
مەملەكەت باسشىسى حالىققا جولداۋىندا ەلدى اۋقىمدى كوگالداندىرۋدىڭ ماڭىزدىلىعىن اتاپ ءوتتى», دەپ جازدى ەلوردا اكىمى.