قاعازدا بار, ءىس جۇزىندە جوق. الماتىنىڭ الاتاي اۋدانىنداعى سانيتاريا-ەپيدەميولوگيا باقىلاۋ باسقارماسى جوق كۇزەت قىزمەتىنە قازىنادان جىل سايىن ميلليونداعان قارجى جىمقىرىپ وتىرعان. جەڭ ۇشىنان جالعاسقان جەمقورلىقتى دارىگەر قايىرعالي كونەەۆ اشكەرەلەدى, دەپ حابارلايدى Egemen.kz كتك تەلەارناسىنا سىلتەمە جاساپ.
«ەكى-ءۇش جىلدان بەرى 150-200 مىڭداي ايلىق الىپ تۇرعان. ۇرلانعان بيۋدجەتتىڭ اقشاسى قوسىمشا ايلىق رەتىندە باستىقتاردىڭ قالتاسىنا ءتۇسىپ وتىرعان. بۇل دۇرىس ەمەس. قازىر دارىگەرلەرگە ۇستەماقى بەرۋگە اقشا جەتپەي جاتىر. كەرىسىنشە, سول جاققا جۇمسالسا ادال بولار ەدى. جىمقىرىلعان اقشا بيۋدجەتكە قايتارىلۋى كەرەك», دەيدى دارىگەر قايىرعالي كونەەۆ.
الماتىلىق دارىگەر العاشىندا بۇل سوراقىلىقتى تانىستارىنان ەستىگەن. سوسىن اڭگىمەنىڭ انىق-قانىعىن ءبىلۋ ءۇشىن قۇزىرلى مەكەمەگە حات جولداعان. جانداربەك بەكشين باسقاراتىن قالانىڭ سانيتاريا-ەپيدەميولوگيا باقىلاۋ دەپارتامەنتى ءوز كەزەگىندە اق حالاتتىنىڭ كۇدىگىن راستاپ, قۇزىرلى ورگان اتالعان ءىس بويىنشا تەرگەۋدى باستاپ كەتكەنىن جەتكىزدى.
باسى داۋعا قالعان الاتاۋ اۋدانىنىڭ قاۋىپسىزدىگىن اكىمدىك قارجىلاندىراتىن كۇزەت قىزمەتى قامتاماسىز ەتەدى. قاعاز جۇزىندە جاۋاپتى دەپارتامەنت وكىلدەرى اۋدان باسقارمالارىنىڭ كۇزەتىنە جىلىنا 2 ميلليوننان استام قاراجات بولەدى ەكەن.
«وسى جاعدايدى بىلگەن كۇننەن باستاپ دەپارتامەنت باسشىسىنىڭ بۇيرىعىمەن قىزمەتتىك تەكسەرىس جۇرگىزىلدى. جينالعان بارلىق ماعلۇمات ۇقك مەن قۇزىرلى ورگاندارعا جولداندى. بۇل قۇزىرلى ورگاندار ءوز تەرگەپ-تەكسەرۋلەرىنىڭ قورىتىندىسىن بىزگە جىبەرەدى. سودان كەيىن عانا ءبىز ءوز قۇزىرەت شەڭبەرىمىزدە اتالعان جاعدايعا بايلانىستى شارا قولدانامىز», دەدى الماتى قالاسى سانيتاريا-ەپيدەميولوگيا باقىلاۋ دەپارتامەنتىنىڭ ءبولىم باسشىسى باۋىرجان قىدىرباي ۇلى.