ادۆوكات جاڭا تۋعان نارەستەنى ءولتىرۋ ءىسى بويىنشا سوت قۇرامىنا قارسىلىق ءبىلدىردى, دەپ حابارلايدى Egemen.kz.
بۇگىن اتىراۋدا پەريناتالدىق ورتالىقتا نارەستەنى مۇزداتقىشقا سالىپ ءولتىرۋ ءىسى بويىنشا اپپەلياتسيالىق سوت وتىرىسى ءوتتى.
پەريناتالدىق ورتالىقتىڭ بۇرىنعى ديرەكتورى قۋانىش نىسانباەۆ پەن باس اكۋشەر-گينەكولوگ اسقار قايىرجاننىڭ قورعاۋشىسى اپپەلياتسيالىق سوتتىڭ بارلىق قۇرامىنا قارسىلىق ءبىلدىردى.
«اپپەلياتسيالىق سوتتىڭ قۇرامىنا قارسىلىق بىلدىردىك. سونداي-اق بۇل ءىستى قاراعان سۋديا اپپەلياتسيالىق سوت قۇرامىنا كىردى. سول سەبەپتى بۇعان كەلىسپەيتىنىمىزدى ءبىلدىرىپ, سوتتىڭ بارلىق قۇرامىن الىپ تاستاۋدى سۇرادىق. سونىمەن قاتار, وبەكتيۆ ساقتاۋ ءۇشىن بۇل ءىستى اتىراۋ وبلىستىق سوتىنان باسقا كەز-كەلگەن سوتقا بەرۋدى سۇرادىق», دەيدى ادۆوكات.
ەسكە سالايىق, ءسابيدىڭ ءولىمى تۋرالى ءىس بويىنشا پەرزەنتحانانىڭ باس دارىگەرى جانە قىلمىسقا قاتىسى بار باسقا دا قىزمەتكەرلەر كىنالى دەپ تانىلىپ, ءتۇرلى مەرزىمگە باس بوستاندىعىنان ايىرىلىعان ەدى.
وبلىستىق پەريناتالدىق ورتالىقتىڭ باسشىسى قۋانىش نىسامباەۆ 18 جىلعا, اكۋشەر-گينەكولوگ اسقار قايىرجان 16 جىلعا سونداي-اق اكۋشەر ءجاميلا كۇلباتىروۆا 15 جىلعا باس بوستاندىعىنان ايىرىلعان بولاتىن.
قىزمەتكەرلەر بالانى ءولى تۋىلدى دەپ تىركەپ, ونىڭ ءتىرى ەكەنى بەلگىلى بولعاندا قۇجاتتاردى قايتا راسىمدەمەي, بالانى ءمايىتحانا توڭازىتقىشىنا جىبەرگەن.
گاۋحار قاپاش