سەنات دەپۋتاتى تالعات مۇساباەۆ پرەمەر-ءمينيستردىڭ اتىنا جولداعان ساۋالىندا ازاماتتىق اۆياتسيا جانە ۇشۋدى ۇيىمداستىرۋ سالاسىنداعى قاۋىپسىزدىك ماسەلەلەرىن قوزعادى, دەپ حابارلايدى Egemen.kz.
زاڭ بويىنشا ازاماتتىق اۆياتسيادا سەرتيفيكاتتاۋ, قاداعالاۋ جانە باقىلاۋمەن يندۋستريا جانە ينفراقۇرىلىمدىق دامۋ مينيسترلىگىنىڭ ازاماتتىق اۆياتسيا كوميتەتى اينالىسۋى كەرەك ەكەن. الايدا, بۇل مەملەكەتتىك فۋنكتسيالار ءىس جۇزىندە ىشكى قۇجاتتار نەگىزىندە شەتەلدىك ازامات باسقاراتىن «قازاقستاننىڭ اۆياتسيالىق اكىمشىلىگى» اق كوممەرتسيالىق كومپانياسىنا بەرىلگەن. «سۋىق اقىلعا سالىپ, ماسەلەنىڭ شەشىمىن زاڭدى ارناعا باعىتتاۋدى ۇسىنامىز. ازاماتتىق اۆياتسياداعى قاداعالاۋ جانە باقىلاۋ جونىندەگى مەملەكەتتىك فۋنكتسيالاردى ازاماتتىق اۆياتسيا كوميتەتىنە قايتارۋ قاجەت دەپ سانايمىز, ال «قازاقستاننىڭ اۆياتسيالىق اكىمشىلىگى» اق قۇرىلعاندىقتان, وعان تەك سەرتيفيكاتتاۋ جونىندەگى فۋنكتسيالاردى قالدىرۋ نەمەسە وعان كوممەرتسيا سۋبەكتىسى ەمەس, بارلىق تۋىندايتىن زاڭنامالىق سالدارى مەن جاۋاپكەرشىلىگى بار مەملەكەتتىك ورگان مارتەبەسىن بەرۋ, وعان مەملەكەتتىك فۋنكتسيالاردى ورىنداۋدى جۇكتەۋ قاجەت», دەپ اتاپ ءوتتى سەناتور. ول ءوزىنىڭ دەپۋتاتتىق ساۋالىندا اۆياتسيالىق جانە ازاماتتىق اۆياتسياداعى وقيعالاردى تەكسەرۋدى, توتەنشە جاعدايلار مينيسترلىگىنە نەمەسە تاۋەلسىز حالىقارالىق ايماقتىق تەرگەۋ ورگاندارىنا بەرۋدى قاراستىرۋ قاجەت ەكەنىن ايتتى.