ەڭبەك جانە حالىقتى الەۋمەتتىك قورعاۋ مينيسترلىگى ەڭبەك, الەۋمەتتىك قورعاۋ جانە كوشى-قون كوميتەتىنىڭ دەرەگى بويىنشا, وسى جىلدىڭ 1-توقسانىندا قازاقستاندا وندىرىستىك جاراقاتتانۋ دەڭگەيى 9,1%-عا تومەندەگەن. 2021 جىلدىڭ قاڭتار-ناۋرىز ايلارىندا وندىرىستەگى جازاتايىم وقيعالاردىڭ سالدارىنان 310 ادام زارداپ شەكتى, ال وتكەن جىلدىڭ سايكەس كەزەڭىندە زارداپ شەككەندەر سانى 341 ادامدى قۇرادى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
بۇل رەتتە وقىس وقيعالار سالدارىنان قازا تاپقانداردىڭ سانى تورتتەن بىرگە قىسقاردى: بيىل – 38 ادام, ال 2020 جىلدىڭ I توقسانىندا – 51 ادام.
وندىرىستىك جاراقاتتانۋدىڭ جوعارى دەڭگەيى قاراعاندى (65 ادام زارداپ شەكتى), شىعىس قازاقستان (34 ادام), اقتوبە (29 ادام), قىزىلوردا (22 ادام), قوستاناي (21 ادام), تۇركىستان (18 ادام) جانە باتىس قازاقستان (17 ادام) وبلىستارىندا تىركەلگەن.
بىرقاتار وڭىردە I توقساندا وندىرىستەگى جازاتايىم وقيعالار سالدارىنان زارداپ شەككەندەر سانى اقتوبە وبلىسىندا 25-تەن 29 ادامعا دەيىن, اتىراۋ وبلىسىندا 6-دان 10 ادامعا دەيىن, قىزىلوردا وبلىسىندا 14-تەن 22 ادامعا دەيىن جانە پاۆلودار وبلىسىندا 13-تەن 15 ادامعا دەيىن ءوستى.
جازاتايىم وقيعالار سالدارىنان قازا بولعاندار سانى 2020 جىلدىڭ ۇقساس كەزەڭىمەن سالىستىرعاندا اقتوبە (4-تەن 7 ادامعا دەيىن), جامبىل (2-دەن 4 ادامعا دەيىن), قىزىلوردا (3-تەن 6 ادامعا دەيىن), باتىس قازاقستان (2-دەن 3 ادامعا دەيىن) وبلىستارىندا كوبەيدى.