رەسەي مادەنيەت مينيسترلىگىنىڭ حابارلاۋىنشا, بىلتىر كورشى ەلدە مۋزەيگە جيىرما ميلليونعا جۋىق ادام بارىپتى. جىل بويىنا 2,7 مىڭ كورمە جوباسى وتكەن. بۇدان بولەك پاندەميالىق احۋالعا بايلانىستى ونلاين فورماتتا ۇيىمداستىرىلعان 23 مىڭ ءىس-شارا 300 ميلليون قارالىم جيناعان.
ال ەلىمىزدە ۇلتتىق ستاتيستيكا بيۋروسىنىڭ مالىمەتىنشە, 2020 جىلى مۇراجايعا كەلۋشىلەردىڭ سانى 2 ميلليون 351 مىڭدى قۇراعان. ونىڭ 37,3 پايىزى (877,2 مىڭ) – بالالار. بىلتىر جالپى سانى 253 مۋزەيدە (ول 2019 جىلمەن سالىستىرعاندا 3 بىرلىككە وسكەن) 62 762 ەكسكۋرسيا وتكىزىلىپ, تىڭداۋشىلارعا 6 972 ءدارىس وقىلعان.
سونىمەن قاتار قورىق-مۇراجايلاردا 1394 تاريح جانە مادەنيەت ەسكەرتكىشتەرى بار. نەگىزگى قورداعى ەكسپوناتتاردىڭ جالپى سانى 2580,3 مىڭدى قۇراسا, ونىڭ 12,2 پايىزى ەكسپوناتتالعان. سونداي-اق نەگىزگى قوردا ەلەكتروندى فورماتتا 1001,1 مىڭ جادىگەر بار. رەسپۋبليكالىق مۋزەيلەردە بارلىعى 4058 كورمە ۇيىمداستىرىلسا, ونىڭ جەتەۋى شەتەلدە وتكىزىلگەن.