مەملەكەت باسشىسى قازاقستانعا جۇمىس ساپارىمەن كەلگەن تاتارستان رەسپۋبليكاسىنىڭ پرەزيدەنتى رۋستام ميننيحانوۆپەن كەزدەسۋ وتكىزدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ تاتارستانمەن ىنتىماقتاستىق رەسەي فەدەراتسياسىمەن اراداعى كەشەندى ءىس-قيمىلداردىڭ ىشىندەگى ەڭ ماڭىزدىسى سانالاتىنىن اتاپ ءوتتى.
مەملەكەت باسشىسى تاتارستان پرەزيدەنتىنىڭ جاقىندا قاراعاندى وبلىسىنا جاساعان ساپارىن جوعارى باعالادى. سول ساپار كەزىندە ساران قالاسىندا دوڭگەلەك شىعاراتىن زاۋىت ىسكە قوسىلعان بولاتىن.
– ءبىز بۇل كاسىپورىنعا ۇلكەن ءۇمىت ارتىپ وتىرمىز. قازاقستاندىقتاردىڭ ۇلكەن ءبىر توبىنا تاتارستاندا ءبىلىم الۋعا مۇمكىندىك جاساعانىڭىز ءۇشىن ريزاشىلىعىمدى بىلدىرەمىن. مەن مۇنى بۇدان كەيىن دە جالعاسى بولاتىن ناقتى جوبا دەپ بىلەمىن. ءبىزدىڭ نارىقتا «تاتنەفت» كومپانياسىنان باسقا, «كاماز» كاسىپورنىمەن بىرلەسكەن جوبالارىمىز دا بار, – دەدى قازاقستان پرەزيدەنتى.
قاسىم-جومارت توقاەۆ تاتارستانمەن مادەني-گۋمانيتارلىق بايلانىستاردى ودان ءارى نىعايتا بەرۋگە بەيىلدى ەكەنىن جەتكىزدى.
– ءبىز تاتار مادەنيەتىن وتە جاقسى بىلەمىز جانە قۇرمەتتەيمىز. سىزدەردىڭ مادەنيەتتەرىڭىز ءبىزدىڭ ەلدە كەڭىنەن تانىمال. تاياۋ ۋاقىتتا, پاندەميا بىتكەننەن كەيىن قازاقستاندا تاتارستان مادەنيەتى مەن ونەرىنىڭ كۇندەرىن وتكىزۋگە كەلىسەمىز دەپ ويلايمىن. ءبىز بۇل ءىس-شارانىڭ تابىستى ءوتۋى ءۇشىن بارلىق جاعدايدى جاسايمىز, – دەدى مەملەكەت باسشىسى.
قاسىم-جومارت توقاەۆ رۋستام ميننيحانوۆقا نۇر-سۇلتان قالاسىنان تاتار حالقىنىڭ كورنەكتى وكىلى, ايتۋلى اقىن عابدوللا توقايدىڭ اتىنا ءبىر كوشە بەرىلەتىنى جايىندا ايتتى. بۇل ەكى حالىق اراسىنداعى ىنتىماقتاستىقتىڭ جارقىن بەلگىسىنىڭ ءبىرى بولماق.
ءوز كەزەگىندە تاتارستان پرەزيدەنتى قازاقستانعا جاساعان كەزەكتى ساپارىنىڭ تابىستى وتكەنىنە ريزاشىلىعىن ءبىلدىردى.
– رەسەي-قازاقستان قارىم-قاتىناستارى اياسىندا تاتارستان كوپتەگەن جوبالاردى ىسكە اسىرىپ جاتىر. ەكىجاقتى بايلانىستاردىڭ ىرگەتاسى بەرىك. ءبىزدىڭ تۇڭعىش پرەزيدەنتىمىز مينتەمىر شاريپوۆيچ شايميەۆ سىزگە دۇعاي سالەم ايتىپ جاتىر. ونىڭ قازاقستاننىڭ تۇڭعىش پرەزيدەنتى نۇرسۇلتان ابىش ۇلىمەن بايلانىسىنىڭ ارقاسىندا ءوزارا قارىم-قاتىناسىمىزدىڭ نەگىزى مىقتى قالانعان, – دەدى رۋستام ميننيحانوۆ.
اڭگىمەلەسۋ بارىسىندا تاراپتار قازاقستان مەن تاتارستان اراسىنداعى ساۋدا-ەكونوميكالىق, ونەركاسىپتىك, ەنەرگەتيكالىق كووپەراتسيالاردى ودان ءارى نىعايتۋ, سونداي-اق, كوروناۆيرۋس پاندەمياسىمەن بىرلەسىپ كۇرەسۋ ماسەلەلەرىن تالقىلادى.