قوستاناي وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى حابارلاعانداي, وقيعا 17 ساۋىردە قوستانايداعى ب.مايلين 18 مەكەنجايىندا بولعان, دەپ جازادى Egemen.kz.
كەشكى ساعات 17:00-دە ءبۇلدىرشىن ءۇشىنشى قاباتتان ەكىنشى قاباتتىڭ شىعىنقى سالىنعان شاتىرىنا قۇلاعان. وقىس جاعداي تۋرالى حابار تۇسكەن بەتتە جەدەل جاردەم مەن قۇتقارۋ توبى وقيعا ورنىنا دەرەۋ جەتتى.
«قۋانىشقا وراي, بالا ءدىن امان. قۇتقارۋشىلار ءسابيدى اتا-اناسى كەلگەنگە دەيىن قۇتقارىپ ۇلگەردى. بالا زارداپ شەككەن جوق, مەديتسينالىق كومەك كورسەتىلمەدى. كوبىنە قايعىلى جاعدايلار اتا-انالاردىڭ بالالارىنا نەمقۇرايدى قاراۋىنان بولىپ جاتادى», دەلىنگەن تجم حابارلاماسىندا.
جىل سايىن كوپتەگەن بالالار بيىكتىكتەن قۇلاپ زارداپ شەگەدى. بۇل تۋرالى ءجيى ايتىلعانىمەن, قايعىلى جاعدايلار ازايماي وتىر. كۇن جىلىنىپ, تەرەزەلەردىڭ اشىلۋىنا بايلانىستى بالالاردىڭ اشىق تەرەزەدەن قۇلاۋى قايعىلى جاعدايعا الىپ كەلۋدە. كوپتەگەن اتا-انالار تەرەزەنى اشىق قالدىرۋدىڭ بالا ءۇشىن قاۋىپتى بولۋى مۇمكىن ەكەنىن ۇمىتىپ كەتەدى.
قۇرمەتتى اتا-انا!
- بالالاردى قاراۋسىز قالدىرماڭىز; - بالالاردىڭ اشىق تەرەزەلەردىڭ جانىندا ويناۋىنا جول بەرمەڭىز; - تەرەزەدە موسكيتتىك تورلار بولعانىمەن ولار تەمىر تور سەكىلدى بولمايتىنىن ەستە ساقتاڭىز; - بالانىڭ وزدىگىنەن تەرەزەنىڭ الدىنا شىعىپ الماۋى ءۇشىن جيھازدى تەرەزەدەن الىسىراق جەرگە ورنالاستىرىڭىز; - بالاڭىزعا تەرەزەدەن ءبىر نارسە كورسەتۋ ماقساتىندا وعان تەرەزەنىڭ الدىندا تۇرۋدى ۇيرەتپەڭىز; - بولمەنى جەلدەتۋ ءۇشىن تەرەزەنىڭ كوزىن پايدالانىڭىز نەمەسە تەرەزەنىڭ جوعارعى جاعىن اشىپ جەلدەتىڭىز; - تەرەزەنىڭ تۇتقالارىن الىپ تاستاڭىز نەمەسە ارنايى قۇلپى بار تۇتقالاردى ورناتىڭىز;- تەرەزەگە بەكىتكىشتەر مەن بۇعاتتاعىشتار ورناتىڭىز.