Covid-19-عا قارسى ۆاكتسينا سالدىرعاندار قايتادان ۆيرۋس جۇقتىرىپ جاتىر. بۇل تۋرالى دەنساۋلىق ساقتاۋ مينيسترلىگىنىڭ سانيتارلىق-ەپيدەميولوگيالىق باقىلاۋ كوميتەتى رەسمي ساۋالعا بەرگەن جاۋابىندا ايتتى, دەپ حابارلايدى Egemen.kz Tengrinews.kz سايتىنا سىلتەمە جاساپ.
«قازىرگى تاڭدا ۆاكتسينادان كەيىن ء(بىرىنشى جانە ەكىنشى كەزەڭ) كوروناۆيرۋس ينفەكتسياسىن جۇقتىرعان 16 جاعداي تىركەلدى. ۆاكتسينادان كەيىن ۆيرۋس جۇقتىرۋدىڭ ەڭ ۇزاق مەرزىمى ەكىنشى كومپونەنتىن سالدىرعاننان كەيىنگى ءتورتىنشى اپتادا تىركەلگەن», دەدى كوميتەت وكىلى.
ۆەدومستۆو كورونوۆيرۋس ينفەكتسياسىنا قارسى يممۋنيتەت ۆاكتسينانىڭ ەكىنشى كەزەڭىن العان ۋاقىتتان باستاپ التى اپتادان كەيىن قالىپتاسا باستايتىنىن ايتتى.
وسىعان دەيىن الماتىدا ۆاكتسينا سالدىرعان دارىگەر ۆيرۋس جۇقتىرعانىن حابارلاعان ەدى. الايدا ول جۇقتىرۋ قاۋپى بار ەكەنىن بىلگەنىن جانە دە الداعى ۋاقىتتا ۆاكتسينانىڭ ەكىنشى كەزەڭىن دە قابىلدايتىنىن ايتقان.
مەديتسينا دوكتورى, بيولوگ جانە Medsupportkz باسشىسى بوتاگوز كاۋكەنوۆانىڭ ايتۋىنشا, ادام ۆاكتسيناتسيادان كەيىن, ۆاكتسيناتسيا سالىنعان كۇنى دە كوروناۆيرۋس جۇقتىرىپ الۋى مۇمكىن.
«ۆاكتسينادا انتيدەنەلەر جوق. ولاردى ۆاكتسيناعا جاۋاپ رەتىندە ءسىزدىڭ اعزاڭىز جاسايدى. انتيدەنەلەر جاساۋ ءۇشىن دەنەگە ۋاقىت قاجەت. بۇل ادەتتە 2-3 اپتاعا سوزىلادى. «سپۋتنيك V» ءبىرىنشى دوزاسىنان كەيىن 3 اپتادان كەيىن ەكىنشى دوزانى سالدىرۋ كەرەك. ودان كەيىن 2-3 اپتادان سوڭ دەنەدە انتيدەنەلەردىڭ جاقسى دەڭگەيى پايدا بولادى», دەپ ءتۇسىندىردى ول.
گاۋحار قاپاش