پرەمەر-ءمينيستردىڭ ورىنباسارى رومان سكليار, توتەنشە جاعدايلار ءمينيسترى يۋري يلين, ەكولوگيا, گەولوگيا جانە تابيعي رەسۋرستار ۆيتسە-ءمينيسترى سەرىك قوجانيازوۆ پەن اقمولا وبلىسىنىڭ اكىمى ەرمەك مارجىقپاەۆ ەلوردانىڭ شەكارا ماڭىنداعى اۋماقتارىندا سۋ تاسقىنى جاعدايىنا مونيتورينگ جۇرگىزۋ ماقساتىندا اۋەدەن باقىلاۋ جاسادى.
ۇشۋ بارىسىندا 42-رازەزد, قاجىمۇقان, قوياندى, تالاپكەر, قاراوتكەل, جىبەك جولى, قوسشى, تايتوبە, قىزىلجار ەلدى مەكەندەرىنىڭ اۋماقتارىنا اەروۆيزۋالدى بارلاۋ جۇرگىزىلدى. استانا سۋ قويماسى مەن نۇرا وزەنى ارناسىنىڭ بويىنداعى پرەوبراجەنسك سۋ تورابىنىڭ جاعدايى تەكسەرىلدى. باقىلاۋ كەزىندە قاردىڭ ەرۋ پروتسەسى تۇراقتى ءجۇرىپ جاتقانى بايقالدى. سۋ شايعان ايماقتار جوق. تاۋلىك بويى جەردەن جانە جەر سەرىگى ارقىلى قاشىقتان زوندتاۋ مونيتورينگىن جۇرگىزۋ جالعاسۋدا. اقمولا, قاراعاندى, قوستاناي, شىعىس قازاقستان جانە سولتۇستىك قازاقستان وبلىستارىنىڭ كەيبىر وزەن اۋماقتارىندا سەڭ ءجۇرۋ ۇدەرىسى باستالدى. قاۋىپتىڭ الدىن الۋ ءۇشىن اقمولا, شىعىس قازاقستان, قاراعاندى, قوستاناي جانە سولتۇستىك قازاقستان وبلىستارىنىڭ وزەندەرى مەن كولدەرىندە مۇز جارۋ جۇمىستارى جۇرگىزىلۋدە. سونداي-اق اقمولا, شىعىس قازاقستان, قوستاناي جانە سولتۇستىك قازاقستان وبلىستارىنىڭ سۋ قويمالارىندا سۋ جيناۋعا قاجەتتى ورىندار ازىرلەنۋدە.