نۇر-سۇلتاندا كوكتەمگى تازالىق جۇمىسى ءداستۇرلى تۇردە جالعاسۋدا. اۋقىمدى جۇمىستارعا 1900 كوممۋنالدىق قىزمەتكەر مەن 650 ارنايى تەحنيكا جۇمىلدىرىلدى. قالانى سانيتارلىق تازالاۋ جانە اباتتاندىرۋ كۇن سايىن, سول سياقتى تۇنگى اۋىسىمدا دا جۇرگىزىلەدى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
قالانىڭ كوممۋنالدىق قىزمەتتەرى كۇن سايىن جولداردى, تروتۋارلاردى, كوپىرلەردى, قورشاۋلاردى, جول بەلگىلەرىن, بيلبوردتاردى جانە ت.ب. جۋادى. «ەلوردا اكىمى التاي كولگىنوۆتىڭ تاپسىرماسى بويىنشا قالادا سانيتارلىق تازالاۋ جۇمىستارى كۇشەيتىلدى, سونداي-اق, ءموبيلدى توپتار قۇرىلىس ۋچاسكەلەرىندە دە ارالاۋ جۇمىستارىن جۇرگىزۋدە. سەبەبى قۇرىلىس نىساندارىندا اباتتاندىرۋ ەرەجەلەرىن بۇزۋ فاكتىلەرى بار. بۇل اۋماقتا ارنايى تەحنيكا دوڭگەلەكتەرىن جۋ پۋنكتەرىنىڭ اشىلماعانى, الاڭىشىلىك وتپە جولداردىڭ قاتتى توسەمەسى قويىلماعانى سەكىلدى بۇزۋشىلىقتار بار. قۇرىلىس جۇمىستارى ەسكەرتۋلەر جويىلعانعا دەيىن توقتاتىلدى», دەدى ەلوردا اكىمىنىڭ ورىنباسارى نۇرلان سولتامبەكوۆ. سونىمەن قاتار, ول قالادا جول شۇڭقىرلارىن جوندەۋ جۇمىستارى جۇرگىزىلىپ جاتقانىن, جاقىن ارادا كوشەلەردى ورتاشا جانە كۇردەلى جوندەۋ باستالاتىنىن اتاپ ءوتتى. قالانىڭ ەسكى بولىگىنە, ءجۇرىپ ءوتۋ مۇمكىندىگى جوعارى تۇرعىن ءۇي ماسسيۆتەرىنە جانە ت.ب. تۇستارعا نازار اۋدارىلاتىن بولادى. بۇعان دەيىن ەلوردا اكىمى التاي كولگىنوۆ ساپاسىز جول جۇمىستارى قابىلدانبايتىنىن, ءوز جۇمىسىن ساپاسىز ورىندايتىن مەردىگەرلەردىڭ ءىسى سوتقا بەرىلىپ, «قارا تىزىمگە» ەنگىزىلەتىنىن اتاپ ءوتتى. ەستەرىڭىزگە سالا كەتەيىك, وتكەن جىلى نۇر-سۇلتاندا 170-تەن استام كوشە جوندەلدى, ونىڭ 100-ءى — تۇرعىن ءۇي الاپتارىندا.