ەڭبەك جانە حالىقتى الەۋمەتتىك قورعاۋ مينيسترلىگى زەينەتاقىعا ۇستەمەاقى تولەنەتىنى تۋرالى اقپاراتتى جوققا شىعاردى, دەپ حابارلايدى Egemen.kz stopfake.kz سايتىنا سىلتەمە جاساپ.
قازاقستاندىقتار مامىر ايىندا بارلىق زەينەتكەرلەر زەينەتاقىعا 40 مىڭ تەڭگە مولشەرىندە ۇستەمەاقى الاتىنى تۋرالى حابارلامانى تاراتۋدا. ءتيىستى جارلىققا پرەزيدەنت قاسىم-جومارت توقاەۆ قول قويعان ەكەن. بۇل فەيك. ەڭبەك جانە حالىقتى الەۋمەتتىك قورعاۋ مينيسترلىگى بۇل اقپاراتتى جوققا شىعاردى.
«مەسسەندجەرلەر مەن الەۋمەتتىك جەلىلەردە مامىر ايىنان باستاپ زەينەتاقىلارعا 40 مىڭ تەڭگە مولشەرىندە جاڭادان ۇستەمەاقى تولەنەتىنى تۋرالى تارالىپ جاتقان اقپارات شىندىققا جاناسپايدى. قولدانىستاعى زاڭنامادا زەينەتاقىلارعا ۇستەمەاقى مەن قوسىمشا اقى تولەۋ قاراستىرىلماعان. قازىرگى كەزدە زەينەتاقى ءۇش بولىكتەن تۇرادى: بازالىق, ورتاق جانە جيناقتاۋشى زەينەتاقى», دەپ ءتۇسىندىردى ۆەدومستۆودا.
بۇگىندە زەينەتكەرلىك جاسقا تولعان قازاقستاندىقتاردىڭ مىناداي تولەمدەرگە قۇقىعى بار:– زەينەتاقى جۇيەسىنە قاتىسۋ وتىلىنە بايلانىستى (1998 جىلعا دەيىن دە, وسى كۇننەن كەيىن دە) زەينەتاقى جاسىنا جەتكەن بارلىق ادامدارعا ەڭ تومەنگى كۇنكورىس دەڭگەيىنىڭ 54%-دان 100% دەيىنگى مولشەردە بەرىلەتىن بازالىق زەينەتاقى تولەمى);– 1998 جىلعى 1 قاڭتارداعى جاعداي بويىنشا كەمىندە 6 اي ەڭبەك ءوتىلى بولعان كەزدە ىنتىماقتى زەينەتاقى (مولشەرى ەڭبەك وتىلىنە جانە زەينەتاقى الدىنداعى كەزەڭدەگى ورتاشا ايلىق تابىسىنا بايلانىستى);– قالىپتاستىرىلعان زەينەتاقى جيناقتارى ەسەبىنەن بىرىڭعاي جيناقتاۋشى زەينەتاقى قورىنان تولەنەتىن زەينەتاقى تولەمدەرى (ولار تاۋسىلعانعا دەيىن).قازاقستان رەسپۋبليكاسى پرەزيدەنتىنىڭ 2014 جىلعى 18 ماۋسىمداعى جارلىعىمەن بەكىتىلگەن قازاقستان رەسپۋبليكاسىنىڭ زەينەتاقى جۇيەسىن ودان ءارى جاڭعىرتۋدىڭ 2030 جىلعا دەيىنگى تۇجىرىمداماسىنا سايكەس ىنتىماقتى زەينەتاقىلاردىڭ مولشەرىن قولايلى دەڭگەيدە ۇستاپ تۇرۋ ءۇشىن ولاردىڭ مولشەرى ينفلياتسيا دەڭگەيىنەن ەكى پايىزعا وزا وتىرىپ, جىل سايىن يندەكستەلەدى. بازالىق زەينەتاقى مولشەرى دە جىل سايىن ينفلياتسيا دەڭگەيىنە كوتەرىلەدى.
2020 جىلعى 1 قاڭتاردان باستاپ ىنتىماقتى زەينەتاقىلار 7%-عا ءوستى, 1 ساۋىردەن باستاپ قوسىمشا تاعى 5%-عا يندەكستەلدى, بۇل جيىنتىعىندا 2019 جىلمەن سالىستىرعاندا ىنتىماقتى زەينەتاقىنىڭ 12%-عا ءوسۋىن قامتاماسىز ەتتى. سونداي-اق بازالىق زەينەتاقى مولشەرى دە ەكى رەت كوتەرىلدى. ونىڭ ءوسىمى 2019 جىلمەن سالىستىرعاندا 10%-دى قۇرادى.
2021 جىلدىڭ باسىنان بەرى ىنتىماقتى زەينەتاقى 7%-عا, بازالىق زەينەتاقى 5%-عا ءوستى.
مينيسترلىك فەيك حابارلامالارعا نازار اۋدارماۋعا جانە تەك رەسمي دەرەككوزدەردەن الىنعان اقپاراتقا عانا سەنۋگە شاقىرادى.
سونداي-اق ۆەدومستۆو جالعان اقپارات تاراتۋ زاڭ بويىنشا جازالاناتىنىن ەسكە سالدى.