رەسپۋبليكالىق دەڭگەيدە مەديتسينالىق اۆياتسيا نىسانىنداعى مەديتسينالىق كومەك 2011 جىلدىڭ ءساۋىر ايىنان باستاپ ەلىمىزدىڭ تۇرعىندارىنا كورسەتىلە باستادى, دەپ حابارلايدى Egemen.kz
شۇعىل كومەكتىڭ بۇل ءتۇرىن مەديتسينالىق اۆياتسيا موبيلدىك بريگاداسىنىڭ جوعارى بىلىكتى ماماندارى كورسەتەدى. مەديتسينالىق اۆياتسيا قىزمەتكەرلەرى — باتىر ادامدار, ولاردىڭ كۇندەلىكتى ەڭبەگى — جاسىنا, جىنىسىنا, الەۋمەتتىك مارتەبەسىنە جانە ورنالاسقان جەرىنە قاراماستان, شۇعىل مەديتسينالىق كومەككە مۇقتاج ادامداردىڭ ءومىرىن قۇتقارۋ. ولار كۇن سايىن مەديتسينالىق كومەك كورسەتۋ جانە پاتسيەنتتەردى وبلىستىق نەمەسە رەسپۋبليكالىق اۋرۋحانالارعا تاسىمالداۋدى جۇزەگە اسىرۋ ءۇشىن وتانىمىزدىڭ شالعاي جانە قول جەتىمدى ەمەس ايماقتارىنا ۇشادى.
بۇگىن ءبىز سىزدەردى ۇلتتىق شۇعىل مەديتسينانى ۇيلەستىرۋ ورتالىعىنىڭ مەديتسينالىق اۆياتسيا موبيلدىك بريگاداسىنىڭ فەلدشەرى باقىت جۇماباەۆپەن تانىستىرعىمىز كەلەدى.
– باقىت, قايىرلى كۇن, فەلدشەر ماماندىعىن تاڭداۋىڭىزعا نە سەبەپ بولدى؟
– Cالەمەتسىز بە. ءبىزدىڭ وتباسىمىز ۇلكەن دارىگەرلەر اۋلەتى, مەن كىشكەنتاي كەزىمنەن باسقا ماماندىقتىڭ ادامى بولا الامىن دەپ ويلاعان جوقپىن. مەنىڭ مەديتسينالىق ءبىلىمىم — ارقالىق مەديتسينالىق ۋچيليششەسىنەن باستالدى, وقۋدان كەيىن جەدەل جاردەم بريگاداسىندا جۇمىس ىستەۋ ارمانى پايدا بولدى. مەديتسينادا سالاسىنداعى 21 جىلدىڭ شامامەن 6 جىلى وسى مەديتسينالىق اۆياتسيادا جالعاسۋدا.
– العاشقى جۇمىس كۇنىڭىز ەسىڭىزدە مە؟
– ارينە. ەڭبەك جولىمدى ارقالىق قالاسىنىڭ جەدەل جاردەم ستانتسياسىنان باستادىم. ءوزىمنىڭ قان قىسىمى جوعارى اجەگە بارعان العاشقى شاقىرتۋىم ەسىمدە جاقسى ساقتالىپ قالدى. ءبىز كەلىپ, قاجەتتى كومەكتى كورسەتتىك, الايدا ۇستاما توقتامادى جانە اجەنى اۋرۋحاناعا اپارۋعا تۋرا كەلدى. ونىڭ كوزدەرى ءالى ەسىمدە. ول بىزگە كورسەتكەن قامقورلىعىمىز ءۇشىن شىن جۇرەكتەن العىسىن ايتىپ, باتاسىن بەردى. بۇل ءومىر بويى ەستە قالادى.
– مەديتسينالىق اۆياتسيا فەلدشەرىنىڭ ماماندىعى وتە ماڭىزدى, جاۋاپتى ەكەنى ءسوزسىز. ءسىزدىڭ جۇمىسىڭىزدا ەڭ قيىن نە نارسە؟
– ءبىزدىڭ بارلىق پاتسيەنتتەرىمىز نەگىزىنەن رەانيماتسيالىق پاتسيەنتتەر. اۋىر حالدەگى پاتسيەنتتى بورتقا الار كەزدە, اسپاندا ءسىز ونىڭ اۋرۋىمەن جالعىز قالاسىز, كەيدە بورت اۋاعا كوتەرىلگەننەن كەيىن پاتسيەنتتىڭ جاي-كۇيى قانداي بولاتىنىن بولجاۋ قيىن. مۇندا پاتسيەنتتى جوعالتپاۋ ءۇشىن بىرەۋگە قوڭىراۋ شالۋعا, كونسۋلتاتسيا الۋعا مۇمكىندىك جوق, شەشىمدى دەرەۋ قابىلداۋ قاجەت. ءبىزدىڭ مىندەتىمىز – دارىگەرمەن بىرلەسە جۇمىس ىستەۋ جانە ءبىر كوماندا بولۋ. ءبىز پاتسيەنتكە قاجەتتى كومەكتى جەدەل كورسەتۋگە ارقاشان دايىن بولۋىمىز كەرەك جانە ءبىزدىڭ جۇمىسىمىزدا تەك ارنايى دايىندىقتىڭ ءوزى جەتكىلىكسىز. كاسىبي تاجىريبە, كەزەك كۇتتىرمەيتىن تەراپيا, حيرۋرگيا, پەدياتريا, اكۋشەريا, گينەكولوگيا جانە باسقا دا مەديتسينانىڭ ءارتۇرلى سالالارىندا كەڭ اۋقىمدى ءبىلىم, سونىمەن قاتار بەلگىلى ءبىر مورالدىق قاسيەتتەر قاجەت. مەنىڭ ويىمشا, ءسىز ۇناتاتىن ماماندىقتا قيىندىقتار بولمايدى. سىزگە تەك ءوز ءىسىڭىزدى جاقسى كورۋىڭىز كەرەك.
– ال, بۇل سالادا ءسىزدى نە قىزىقتىرادى؟
– كوپ نارسە. مەنىڭ جۇمىس كۇنىم ەشقاشان قايتالانبايدى. ءار كۇن - بۇل جاڭا ادامدار, جاڭا باعىتتار, مىنەزدى, ءبىلىمدى سىناۋ, اداممەن سويلەسە ءبىلۋ. ءبىزدىڭ ىسىمىزدە كەزدەيسوق ادامدار جوق. ەڭ باستىسى, ادام ءومىرىن قۇتقارعان كەزدە قاناعاتتانىپ, كەرەمەت كوڭىل-كۇيدە بولاسىڭ. – مۇنداي پسيحولوگيالىق اۋىرتپالىققا قالاي توتەپ بەرەسىز؟
– ەگەر ءبىز ءوز ەموتسيالارىمىزدى ۇستاي الماساق, ءبىز ءوز جۇمىسىمىزدى ورىنداي المايمىز. بۇل جىلدار بويى, تاجىريبەمەن كەلەدى. قالاي بولعاندا دا, پاتسيەنت ءۇشىن الاڭداۋ بولادى, بىراق ونى كورسەتۋ كاسىبيلىك ەمەس. ۇستامدى بولۋ قاجەت, پسيحولوگيانى وقۋ, وزىڭمەن, ءوزىڭنىڭ ەموتسيالارىڭمەن جۇمىس جاساي ءبىلۋ قاجەت.
– جۇمىس كۇنىڭىز قالاي وتەتىنىن ايتىڭىزشى. ءبىر اۋىسىمدا قانشا ۇشۋ ورىندايسىزدار؟
– اۋىسىمعا اۋىسپاس بۇرىن ءبىز قىسىمدى, تەمپەراتۋرانى ولشەۋ, جالپى جاي-كۇيدى باعالاۋ سياقتى مىندەتتى مەديتسينالىق قاراپ-تەكسەرۋدەن وتەمىز. ادامدارعا كومەكتەسۋ ءۇشىن مەن ەڭ الدىمەن فيزيكالىق جانە پسيحولوگيالىق تۇرعىدان جاقسى بولۋىم كەرەك. بريگادانىڭ جۇمىسى جابدىقتىڭ جارامدىلىعىن تەكسەرۋدەن باستالادى. سونداي-اق دارىلەردىڭ قاجەتتى كولەمىنىڭ بولۋى دا تەكسەرىلەدى.وسىدان كەيىن ءبىز «كۇتۋ رەجيمىندە» بولامىز: مەديتسينالىق كومەك كۇن مەن ءتۇننىڭ كەز كەلگەن ۋاقىتىندا قاجەت بولۋى مۇمكىن – ءبىز ارقاشان ازىرلىك ۇستىندەمىز. تاۋلىك ىشىندە بريگادا 1-دەن 3-كە دەيىن ۇشىپ شىعۋدى جۇزەگە اسىرادى.
– پاندەميا بارلىق قىزمەت سالالارىنا وزىندىك تۇزەتۋلەر ەنگىزدى جانە ەڭ الدىمەن مەديتسيناعا اسەر ەتتى. سىزدەردە اتاپ ايتقاندا نە وزگەردى؟
– كوروناۆيرۋستىق پاندەميا بارلىعىمىز ءۇشىن ەڭ ۇلكەن سىناق بولدى. پاتسيەنتكە ۇشقان كەزدە: جەكە قورعانىس قۇرالدارىندا جۇمىس ىستەۋ قاجەتتىگى سياقتى بەلگىلى ءبىر تۇزەتۋلەر ەنگىزىلدى. پاتسيەنتتەرگە مەديتسينالىق كومەك كورسەتۋ كەزىندە باسقالار ءۇشىن ينفەكتسيا كوزى بولماۋ وتە ماڭىزدى. پاتسيەنتتى تاسىمالداعاننان كەيىن مىندەتتى تۇردە اۋە كەمەسىنىڭ سالونىنا دەزينفەكتسيا جۇرگىزىلەدى.كوروناۆيرۋستىق ينفەكتسيامەن كۇرەستە كوپتەگەن ەلدەر, ونىڭ ىشىندە ءبىزدىڭ ەلدەرىمىز دە, كوپتەگەن جاقسى, كاسىبي مەديتسينالىق مامانداردان ايىرىلعانى وتە وكىنىشتى.
– ءومىرىڭىزدى مەديتسينامەن بايلانىستىرعانىڭىزعا وكىنبەيسىز بە؟
– جوق, بۇل مەنىڭ ءومىرىمنىڭ اجىراماس بولىگى. مەن جۇمىس ىستەۋگە دايىنمىن, ادامدارعا كومەكتەسۋ ماعان ۇنايدى. مەنىڭ جۇمىسىمنىڭ ارقاسىندا مەن ءوز ءىسىمنىڭ كاسىبي ماماندارىمەن – جاعدايى اۋىر پاتسيەنتتەرگە بىرگە ۇشاتىن ارىپتەستەرىم مەديتسينالىق كونسۋلتانتتارمەن, وپەراتسيالاردى ورىندايتىن دارىگەرلەرمەن تانىستىم. مەن ولاردان كوپ نارسەنى ۇيرەنەمىن. قازىر مەديتسينا قىزمەتكەرلەرىنىڭ كوپشىلىگىنىڭ دايىندىق دەڭگەيى جوعارى, ءبىز ءوز داعدىلارىمىزدى ۇنەمى جەتىلدىرىپ وتىرامىز, وزىق ادىستەرگە ۇيرەنەمىز, مەديتسينالىق مانيپۋلياتسيالار تەحنيكاسىن پىسىقتايمىز.
– بيىلعى جىل ماڭىزدى, ەرەكشە كۇندەرگە تولى. قازاقستان رەسپۋبليكاسى تاۋەلسىزدىگىنىڭ 30 جىلدىعى مەن مەديتسينالىق اۆياتسيا قىزمەتىنىڭ 10 جىلدىعى قارساڭىندا ادامدارعا قانداي تىلەك ايتار ەدىڭىزى؟
– ادامدار اۋىرماسىن, پاندەميا اياقتالسىن دەپ تىلەيمىن. حالقىمىزدىڭ دەنساۋلىعىن ساقتاۋ ماقساتىندا بىرلەسىپ جاسالعان جۇمىس ءۇشىن تاعدىرىما جانە ارىپتەستەرىمە العىس ايتامىن جانە مەديتسينالىق اۆياتسيا سالاسىنىڭ دامۋىنا تىلەكتەسپىن.
– باقىت, سۇحبات بەرگەنىڭىز ءۇشىن سىزگە دە العىس ايتامىز.
مەديتسينا قىزمەتكەرى ماماندىعى العىس پەن جوعارى گۋمانيزممەن ەرەكشەلەنەدى. ءسىزدىڭ كاسىبيلىگىڭىز, جانقيارلىعىڭىز بەن مەيىرىمدىلىگىڭىز دەنساۋلىقتى قالپىنا كەلتىرىپ قانا قويماي, كوپتەگەن ادامداردىڭ ءومىرىن ساقتاپ قالۋعا مۇمكىندىك بەرەدى. زور ەڭبەگىڭىز ءۇشىن راحمەت! شىدامدىلىق, جاقسىلىق جانە مىقتى دەنساۋلىق!