«عارىشقا اپارار جول» تاقىرىبىندا حالىقارالىق فورۋم ءوتتى

قر بجعم مەكتەپكە دەيىنگى جانە ورتا ءبىلىم بەرۋ كوميتەتىنىڭ ءتورايىمى مايرا مەلدەبەكوۆا, «بوبەك» ۇعپببسو-نىڭ باس ديرەكتورى ەلەنا ساكەنوۆا, ء«اۇدۇي» كەاق پرەزيدەنتىنىڭ مىندەتىن اتقارۋشى يرينا كالاچەۆا جانە «بوبەك» ۇعپببسو وبسەرۆاتورياسىنىڭ ديرەكتورى رايسيا كۋدياكوۆا العى ءسوز سويلەدى. 

قازاقستان رەسپۋبليكاسىنىڭ عارىشكەرى, اسكەري-اۋە كۇشتەرىنىڭ گەنەرال-مايورى, «حالىق قاھارمانى» اتاعىنىڭ يەگەرى,  «قازاقستان عارىش ساپارى» ۇلتتىق كومپانياسى توراعاسىنىڭ ورىنباسارى ايدىن ايىمبەتوۆ 60 جىل بۇرىن «بايقوڭىر» كوسمودرومىنان يۋري گاگارين «ۆوستوك-1» كەمەسىندە عارىشقا اتتانعانىن ايتتى. «بۇل ەلىمىز ءۇشىن ەرەكشە مەرەكە بولدى. ياعني, عارىشكەر يۋري گاگارين العاش رەت عارىشقا  قازاق جەرىنەن ۇشتى. ول جەر شەگىنەن شىققان تۇڭعىش ادام بولىپ, ادامزات ءۇشىن جاڭا كەزەڭدى اشتى. بۇل كۇن زور گۋمانيستىك ماڭىزعا تولى», دەدى ول. 

عارىشتىق قىزمەتتىڭ دامۋى قازاقستان ءۇشىن باسەكەگە قابىلەتتىلىگى زور جانە ەلىمىزدىڭ قارقىندى يندۋستريالاندىرۋدىڭ مىقتى فاكتورىنىڭ ءبىرى بولىپ تابىلادى. قازاقستان 2030 جىلعا عارىشتىق قىزمەت كورسەتۋدىڭ دۇنيەجۇزىلىك نارىعىندا ءوز قولدانىس اياسىن كەڭەيتۋ ءتيىس. 

ەلەنا ساكەنوۆا رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى سارا الپىسقىزى نازارباەۆانىڭ باستاماسىمەن, 2009 جىلى «بوبەك» ورتالىعىندا بىرەگەي ءبىلىم بەرۋ وبسەرۆاتورياسىنىڭ اشىلعانىن اتاپ ايتتى. 2010 جىلدان باستاپ سوڭعى 10 جىل ىشىندە «بوبەك» ورتالىعىنىڭ وبسەرۆاتورياسىندا 79 رەسپۋبليكالىق (6708 قاتىسۋشى) جانە 50 حالىقارالىق (377 قاتىسۋشى)  ءىس-شارا وتكىزىلدى. 2092 قاتىسۋشى رەسپۋبليكالىق شارالاردىڭ, 148 قاتىسۋشى حالىقارالىق ءىس-شارالاردىڭ جۇلدەگەرلەرى اتاندى. 

وبسەرۆاتوريانىڭ «بوبەك» ورتالىعىنىڭ قۇرىلىمدىق بولىمشەسى بولىپ, عارىشتىق باعىت بويىنشا ءبىلىم بەرۋ باعدارلامالارىن ۇيىمداستىرىپ جۇزەگە اسىراتىنى تۋرالى رايسيا كۋدياكوۆا مالىمدەدى. ول فورۋمعا قاتىسۋشىلاردى تەلەسكوپ, كومپيۋتەرلەر, روبوتوتەحنيكا سياقتى زاماناۋي قۇرىلعىلارمەن جابدىقتالعان وبسەرۆاتوريا قىزمەتىنىڭ نەگىزگى باعىتتارىمەن تانىستىردى. سونىمەن قاتار, كوماندالار قۇرامىندا حالىقارالىق استرونوميالىق وليمپيادالارعا, تۋرنيرلەرگە, بايقاۋلار مەن كونفەرەنتسيالارعا قاتىساتىن رەسپۋبليكا مەكتەپتەرىنىڭ وقۋشىلارى وبسەرۆاتوريادا دايىندىقتان وتەتىنى ايتىلدى.

سونداي-اق, وسى جيىندا پەدوگوگيكا عىلىمدارىنىڭ دوكتورى, گ. م. گرەچكو اتىنداعى نيجەگورودتىق پلانەتاريدىڭ ديرەكتورى گ.ا. مۋرومتسەۆا (رەسەي), استرونوميا جانە استروفيزيكا بويىنشا حالىقارالىق وليمپيادانىڭ ۇيلەستىرۋشىسى ۆ.ي. زاگاينوۆا (كانادا), تاراس شەۆچەنكو اتىنداعى كيەۆ ۇلتتىق ۋنيۆەرسيتەتىنىڭ فيزيكا فاكۋلتەتىنىڭ ينجەنەرى ا.ا. سيمون  (ۋكراينا) جانە تاعى باسقا ماماندار بايانداما جاسادى.