شىعىس قازاقستان وبلىسىندا پوليتسيا قىزمەتكەرلەرى 5 توننادان استام زاڭسىز اۋلانعان بالىقتى تاركىلەدى, دەپ حابارلايدى Egemen.kz
وبلىستىق پوليتسيا دەپارتامەنتى ءباسپاسوز قىزمەتى حابارلاعانداي, پوليتسەيلەرگە زايسان كولىنىڭ جاعاسىندا تاسساي اۋىلىنىڭ تۇرعىندارى زاڭسىز بالىق اۋلاۋمەن اينالىساتىندىعى تۋرالى حابار كەلىپ ءتۇستى.
ءتارتىپ ساقشىلارى «قاراقاس» ۋچاسكەسىندە 34 جاستاعى ەر ادامدى ۇستاپ, تەكسەرۋ بارىسىندا ونىڭ «ۆاز» اۆتوكولىگىنەن بالىق اۋلايتىن قۇرالدار جانە 150 كەلىدەن استام زاڭسىز اۋلانعان شورتان, كوكسەركە, تابان بالىقتارى تاركىلەندى. اتالعان فاكتى بويىنشا قر قك-ءنىڭ 335-بابى 1-بولىگىنە (بالىق رەسۋرستارىن, باسقا سۋ جانۋارلارىن نەمەسە وسىمدىكتەرىن زاڭسىز ءوندىرۋ) سايكەس تەرگەۋ باستالدى.
«جىل باسىنان بەرى پوليتسيا قىزمەتكەرلەرى مەملەكەتتىك ورگاندارمەن بىرلەسىپ تابيعاتتى قورعاۋ زاڭناماسىن بۇزۋدىڭ 237 فاكتىسىن انىقتادى. سونىڭ ناتيجەسىندە, 5 توننادان استام بالىق تاركىلەنگەن», دەدى شقو پد باستىعى ساعات ماديەۆ.