ەۋرازيا ۇلتتىق ۋنيۆەرسيتەتى فيزيكا-تەحنيكالىق فاكۋلتەتىنىڭ ءبىرىنشى كۋرس ستۋدەنتتەرى ماعجان سۇلتانوۆ پەن دياس كامالوۆ ۋنيۆەرسيتەتتىڭ باس عيماراتى جانىندا اقبۇلاق وزەنىندە سۋعا باتىپ بارا جاتقان بالانى قۇتقارىپ قالدى.
وقيعا 2021 جىلدىڭ 26 ناۋرىزى كۇنى كەشكە قاراي ورىن العان. ۋنيۆەرسيتەتتەن شىققان ستۋدەنتتەر كومەك سۇراپ ايقايلاعان بالانىڭ داۋسىن ەستيدى. دەرەۋ وزەنگە قاراي جۇگىرىپ, سۋعا باتىپ بارا جاتقان 8-9 جاستاعى بالانى كورەدى. كوپ ويلانباستان ولار كومەككە اسىعادى. مۇزعا قارمانعان بالانى سۋدان شىعارىپ, ۇستىندەگى كيىمدەرىن شەشىپ, وراپ تاستايدى. وسى كەزدە جوو قىزمەتكەرى بوتاگوز پاراتحان جۇبايىمەن بىرگە جاقىن ماڭدا جۇرگەن, ولاردى اۆتوكولىككە سالىپ, بالانى ۇيىنە اپارۋدى ۇسىنادى.
ۇيگە بارعان سوڭ ستۋدەنتتەر بالانىڭ سۋ بولعان كيىمىن قۇرعاتىپ كيۋىنە كومەكتەسىپ, جىلى سۋسىن بەرىپ, اتا-اناسىنا وقيعا تۋرالى حابارلايدى. جوو-نىڭ ءباسپاسوز قىزمەتىنە بەرگەن سۇحباتىندا ماعجان ءوز قاۋىپسىزدىگى تۋرالى ءبىر مينۋت تا ويلانباعانىن ايتتى. «مەندە ءبىر عانا وي بولدى, – دەيدى ول. – قايتكەندە بالانى قۇتقارۋ!»
ماعجاننىڭ ءوزى – وتباسىنداعى جالعىز ۇل. ول يادرولىق فيزيكا ماماندىعى بويىنشا وقيدى. بۇل ماماندىقتى تاڭداعانىنا قۋانىشتى, ويتكەنى ول اتومدار مەن مولەكۋلالارمەن جۇمىس ىستەگەندى ۇناتادى.
ال دياس كامالوۆ تەحنيكالىق-فيزيكا ماماندىعى بويىنشا ءبىلىم الادى. قوستاناي وبلىسى رۋدنىي قالاسىندا تۋعان, وتباسىنىڭ كەنجەسى. ماعجانمەن بىرگە ول دا مۇنداي ساتتەردە قورقىنىش تۋرالى ويلاۋدىڭ ءوزى ارتىق دەپ ەسەپتەيدى.