كەزدەسۋ بارىسىندا قازاقستاننىڭ قورعانىس-ونەركاسىپ كەشەنى كاسىپورىندارىمەن ىنتىماقتاستىق, باقىلاۋ جانە ساپا ماسەلەلەرى تالقىلانىپ, شىعارىلاتىن ءونىمدى ءار تاراپتاندىرۋ تۋرالى ۇسىنىستار ەنگىزىلدى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
اتالعان وتىرىسقا قورعانىس ءمينيسترىنىڭ ورىنباسارى گەنەرال-مايور رۋسلان شپەكباەۆ, يندۋستريا جانە ينفروقۇرىلىمدىق دامۋ مينيسترلىگىنىڭ ۆيتسە-ءمينيسترى ادىلبەك سارسەنباەۆ, قاۋىپسىزدىك كەڭەسىنىڭ اسكەري قاۋىپسىزدىك جانە قورعانىس ءبولىمى مەڭگەرۋشىسىنىڭ ورىنباسارى ازامات بەيىسپەكوۆ جانە ەلىمىزدىڭ قورعانىس-ونەركاسىپ كەشەنىنىڭ وكىلدەرى قاتىستى.
گەنەرال-مايور رۋسلان شپەكباەۆ سونداي-اق, وتاندىق قورعانىس ونەركاسىپ كەشەنىنىڭ قارقىندى دامۋىن باياندادى. ءوندىرىستىڭ اعىمداعى احۋالى تۋرالى ايتىپ, قورعانىس-ونەركاسىپ كەشەنىنىڭ جەكەلەگەن ماسەلەلەرىن قوزعادى.
- بۇگىندە قازاقستاندا قورعانىس-ونەركاسىپ كەشەنىنىڭ 40-تان استام كاسىپورنى جۇمىس ىستەيدى. ولاردىڭ كوبى اسكەرگە قاجەتتى ونىمدەردى شىعارا وتىرىپ, قارۋلى كۇشتەرمەن ىنتىماقتاستىقتى جالعاستىرۋدا. الايدا تەز ارادا بىرلەسىپ شەشىمىن تابۋدى كەرەك ەتەتىن, شەشىلمەگەن ماسەلەلەر دە بار, - دەپ اتاپ ءوتتى قورعانىس ءمينيسترىنىڭ ورىنباسارى.
سوڭعى قارۋلى قاقتىعىستار ۇشقىشسىز ۇشۋ جۇيەلەرى, جوعارى دالدىكتى كوزدەيتىن قارۋ, راديوەلەكتروندى كۇرەس كۇشتەرى, روبوتوتەحنيكا سىندى جاڭا قارۋ-جاراق تۇرلەرىنىڭ ماڭىزدىلىعىن كورسەتۋدە. جاۋىنگەرلىك اۆياتسيانى, ارتيللەريا, اۋە شابۋىلىنا قارسى قورعانىس, بروندى تانكتى تەحنيكا, راديوەلەكتروندى كۇرەس كۇشتەرى جانە تاعىدا باسقالارىن قوسا العاندا, اسكەردى تولىقتاي قارۋ-جاراقتىڭ جاڭا تۇرلەرىمەن جابدىقتاۋ قاجەتتىلىگى ارتتى.
قورعانىس-ونەركاسىپ كەشەنى, سوندىقتان قارۋ-جاراق نارىعىنىڭ جاعدايىنا سايكەس كەلۋى كەرەك. ارميانىڭ قاجەتتىلىكتەرىن قاناعاتتاندىرۋ ءۇشىن جوعارى تەحنولوگيالىق جانە كادرلىق الەۋەتكە يە بولۋى قاجەت.
2019 جىلى قورعانىس مينيسترلىگىنىڭ باستاماسىمەن 96 اسكەري ءونىمدى قامتيتىن ءتىزىم, 57 جوبانىڭ تىزبەسى ازىرلەنىپ, ولاردى قورعانىس-كاسىپورىندارىندا شىعارۋ ءۇشىن يندۋستيريا جانە ينفروقۇرىلىمدىق دامۋ مينيسترلىگىنە جىبەردى.
ولاردىڭ كەيبىرىن كاسىپورىندار قازىرگى ءوندىرىس قۋاتىمەن شىعارۋعا بولاتىنىن راستادى, ال باسقالارى بويىنشا جۇمىس جالعاسۋدا نە بولماسا ەكونوميكالىق تۇرعىدا ماقساتقا ساي ەمەس دەپ تانىلدى.
قورعانىس ۆەدومستۆوسى بۇدان وزگە دە, اعىمداعى جىلى توعىز باعىت بويىنشا اسا ماڭىزدى ونىمدەر تىزبەسىن قالىپتاستىردى. ولاردىڭ وتاندىق قورعانىس-ونەركاسىپ كەشەنىندە شىعارۋ قاجەت.
قورعانىس مينيسترلىگى قورعانىس اۋقىمىنداعى مەملەكەتتىك ساياساتتى جۇزەگە اسىراتىن ورگان رەتىندە, ءبىرىنشى كەزەكتە مىقتى قورعانىس-ونەركاسىپ كەشەنىنە مۇددەلى ەكەنىن ايتا كەتەلىك.
قورعانىس مينيسترلىگىنىڭ ۇسىنىستارىن ەسكەرە وتىرىپ, وتاندىق كاسىپورىنداردا كەلەشەكتە ءونىم شىعارۋدى دامىتۋدىڭ جوبالارى بويىنشا بىرىڭعاي ۇستانىم ازىرلەۋ تۋرالى ۇسىنىستار ەنگىزىلدى.