باشقۇرتستان استاناسى ۋفا قالاسىندا وتكەن «زوۆ ۋرالا» اتتى وركەسترلەر جانە ۇلت اسپاپتار انسامبلدەرىنىڭ حالىقارالىق بايقاۋ-فەستيۆالىندە قوستاناي وبلىسى التىنسارين اۋدانىنىڭ «مۇراگەر» قازاق ۇلت اسپاپتار ءانسامبلى توپ جاردى.
وسىمەن ءتورتىنشى جىل ۇيىمداستىرىلىپ وتىرعان حالىقارالىق بايقاۋ بيىل ىندەتكە قارسى شەكتەۋ تالاپتارىنا سايكەس ونلاين رەجىمدە ءوتتى. ءداستۇرلى مۋزىكا مەرەكەسىنە رەسەي, تۇركيا, قازاقستان, وزبەكستان مەملەكەتتەرىنەن جالپى سانى 80-نەن استام كاسىبي جانە كوركەمونەرپازدار ۇجىمى, سونداي-اق ستۋدەنتتەر, بالالار انسامبلدەرى مەن وركەسترلەرى قاتىسقان.
ايبەك سىزدىقوۆ جەتەكشىلىك ەتەتىن التىنسارين اۋداندىق «مۇراگەر» قازاق ۇلت اسپاپتار ءانسامبلى سۇگىردىڭ «بوزىنگەنىن», نۇرتۋعاننىڭ تەرمەسى مەن ەرمۇرات ۇسەنوۆتىڭ اسپاپتى وركەسترگە ارنالعان «قارا جورعا» تۋىندىسىن ورىنداپ, ونى بەينەتاسپاعا ءتۇسىرىپ بايقاۋ-فەستيۆالدىڭ سايتىنا جۇكتەگەن. وسىلايشا, بايقاۋ قورىتىندىسى بويىنشا اۋداندىق انسامبل جۇلدەلى ءبىرىنشى ورىندى يەلەندى.
– حالىقارالىق بايقاۋعا رەسەيدىڭ حالىق ءارتىسى, ۆ.اندرەەۆ اتىنداعى سانكت-پەتەربۋرگ مەملەكەتتىك اكادەميالىق ورىس وركەسترىنىڭ باس ديريجەرى دميتري حوحلوۆ, قازاقستاننىڭ حالىق ءارتىسى, قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى ايگۇل ۇلكەنباەۆا, باشقۇرتستاننىڭ حالىق ءارتىسى راميل عايزۋللين, وزبەكستاننىڭ حالىق ءارتىسى فارۋك سادىقوۆ سىندى وركەستر جانە انسامبل ونەرىنىڭ كورنەكتى قايراتكەرلەرى قازىلىق ەتتى. بۇگىندە سوليستەر مەن كامەرالىق ۇجىمدار اراسىنداعى مۋزىكالىق بايقاۋلار ءجيى ۇيىمداستىرىلادى. دەگەنمەن بۇگىندە باشقۇرتستانداعى حالىقارالىق فەستيۆال جالپى رەسەيدەگى بىرەگەي بايقاۋ رەتىندە مويىندالىپ وتىر. ويتكەنى ۇلكەن وركەسترلەر مەن ءىرى انسامبلدەردىڭ شىعارماشىلىق سايىسى رەسەي كولەمىندە ۋفادا عانا وتەدى. فەستيۆالگە قاتىسۋشىلاردىڭ شەبەرلىگى جىلدان جىلعا شىڭدالىپ كەلە جاتقانىن, اسىرەسە بايقاۋدىڭ گەوگرافياسى كەڭەيە تۇسكەنىن قازىلار القاسى دا اتاپ ءوتتى, – دەدى اۋداندىق «مۇراگەر» قازاق ۇلت اسپاپتار ءانسامبلىنىڭ جەتەكشىسى ايبەك سىزدىقوۆ.
اتالمىش حالىقارالىق بايقاۋ-فەستيۆالىنىڭ گران-پري سىيلىعىنا ەكى بىردەي ونەر ۇجىمى – ا.جۇبانوۆ اتىنداعى دارىندى بالالارعا ارنالعان مامانداندىرىلعان مۋزىكا مەكتەپ-ينتەرناتىنىڭ حالىق وركەسترى مەن ل.بەززۋبوۆ اتىنداعى تۇمەن ورىس حالىق اس-پاپتار وركەسترى لايىق دەپ تانىلدى.
قوستاناي وبلىسى