بۇگىن حالىقارالىق تۇركى اكادەمياسىندا ماجارستان جانە قازاقستان سىرتقى ىستەر مينيسترلەرىنىڭ قاتىسۋىمەن جىر الىبى جامبىلدىڭ ماجار تىلىندەگى تۇڭعىش جىر جيناعىنىڭ تۇساۋكەسەر ءراسىمى ءوتتى, دەپ حابارلايدى Egemen.kz اكادەميانىڭ ءباسپاسوز قىزمەتىنە سىلتەمە جاساپ.
ۇلى دالا جىرشىسىنىڭ 175 جىلدىق مەرەيتويى اياسىندا جارىق كورىپ وتىرعان «جامبىل جىرلارى – Dzsambul muvei» جيناعى قازاق-ماجار تىلدەرىندە سالىستىرمالى تارتىپپەن بەرىلگەن ولەڭدەرمەن قاتار, مازمۇندى زەرتتەۋ ماقالالاردى دا قامتىعان. جيناقتى قۇراستىرىپ, باسپاعا ازىرلەۋگە حينايات باباقۇمار, تاكاچ يبويا سىندى عالىمدار اتسالىسقانىن ايتا كەتۋ كەرەك.
كىتاپتىڭ تانىستىرۋ راسىمىنە ماجارستاننىڭ سىرتقى ساۋدا جانە سىرتقى ىستەر ءمينيسترى پەتەر سييارتو, قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى, حالىقارالىق تۇركى اكادەمياسىنىڭ پرەزيدەنتى دارحان قىدىرالى, ماجارستاننىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى ميحاي گالوشفاي, سونىمەن قاتار ماجارستان دەلەگاتسياسى, مەملەكەت جانە قوعام قايراتكەرلەرى قاتىستى.