سەناتورلار «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسىن تالقىلادى. وسى كەلىسىم اياسىندا تاراپتار كوشى-قون سالاسىنداعى ەكىجاقتى ىنتىماقتاستىقتى كۇشەيتۋدى جوسپارلاپ وتىر, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
كوروناۆيرۋس كەزەڭىندە كوپتەگەن كوشىپ-قونۋشىلار قازاقستان اۋماعىنان شىعا المادى. سوندىقتان ولاردىڭ قازاقستاندا بولۋ مەرزىمىن ۇزارتۋ تۋرالى ۇكىمەتتىڭ قاۋلىسى قابىلدانعان بولاتىن. جىل باسىندا كوشى-قون قىزمەتى حالىقارالىق كوشى-قون ۇيىمىمەن بىرلەسە وتىرىپ جۇمىس جۇرگىزدى جانە سونىڭ ناتيجەسىندە 133 مىڭ ميگرانت وتانىنا ورالدى.
كوميتەت توراعاسى ۆلاديمير ۆولكوۆ كوروناۆيرۋس پاندەمياسى كەزىندە كوشى-قون زاڭناماسىن بۇزعان 3 مىڭنان استام شەتەلدىك ازامات اكىمشىلىك جاۋاپكەرشىلىككە تارتىلعانى تۋرالى كەڭەيتىلگەن وتىرىسقا قاتىسۋشىلاردى حاباردار ەتتى. سونداي-اق قازاقستان ارقىلى زاڭسىز ترانزيت ارناسىن ۇيىمداستىرعاندار ءۇشىن 27 قىلمىستىق ءىس قوزعالدى.
سەنات دەپۋتاتى نۇرلان بەكنازاروۆ زاڭ جوباسىنىڭ نەگىزگى مىندەتى كوشى-قون پروتسەستەرى مەن ازاماتتىق ماسەلەلەرىنە قاتىستى مالىمەتتەر الماسۋعا قولايلى جاعداي جاساۋ, سونداي-اق زاڭسىز كوشى-قون ارنالارىن انىقتاۋ ەكەنىن اتاپ ءوتتى.
«قۇجات كوشى-قون جانە ازاماتتاردىڭ قۇقىقتارىن قورعاۋ سالاسىندا ءوزارا ءىس-قيمىلدى جۇزەگە اسىرادى. زاڭ جوباسىن قابىلداۋ زاڭسىز كوشى - قونعا قارسى كۇرەستە جانە كوشى-قون پروتسەستەرىن رەتتەۋدە ەكى ەل ىنتىماقتاستىعىنىڭ تيىمدىلىگىن ارتتىرۋ بويىنشا قۇقىقتىق نەگىز جاساۋعا مۇمكىندىك بەرەدى», دەدى سەناتور.
كەلىسىمگە قاتىسۋشى ەلدەر قاجەت بولعان جاعدايدا باسقا ەلدىڭ اۋماعىندا بولعان ەكى ەلدىڭ ازاماتتارىن تۇرعىلىقتى جەرى بويىنشا تىركەۋ جونىندەگى مالىمەتتەردى الا الادى دەپ كۇتىلىپ وتىر.
كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتى زاڭ جوباسىن پالاتانىڭ قاراۋىنا ەنگىزدى.