«ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ جانە تۇركيانىڭ ەڭ ءىرى مەديا حولدينگى «ترت» مەملەكەتتىك تەلەراديو كورپوراتسياسىنىڭ قازاقستانداعى وكىلى مەحمەد زاحيد چالىشكان مەن تەلەارنا ءتىلشىسى گۇزال سايتوۆا ۇكاشا اتا قۇدىعى ماڭىندا ارشا تۇقىمداس تۋيا اعاشىن ەكتى, دەپ حابارلايدى Egemen.kz.
قۇرعاق جانە ىستىق كليماتقا جانە كۇن ساۋلەسىنە ءتوزىمدى تۋيا - ءومىر اعاشى دەپ اتالاتىنى بەلگىلى.
تۇركىستانعا جاساعان ساپار بارىسىندا قاسيەتتى جەرگە اعاش وتىرعىزۋعا قاتىسقان قوناقتار بۇل ءىستى جاقسىلىققا جورىپ, مۋزەي باسشىلىعىنا العىس ايتتى.
اللانىڭ سوڭعى دا سۇيىكتى ەلشىسى مۇحاممەد (س.ع.س.) پايعامباردىڭ ساحاباسى ۇكاشا اتا كەسەنەسىندە قۇران باعىشتاپ, قاسيەتتى قۇدىعىنان ءدام تاتقان تۇركيالىق باق وكىلدەرى قاسيەتتى دە كيەلى, تاريحي ورىندى الىس-جاقىن شەت ەل تۋريستەرىنىڭ دە نازارىنا ۇسىنۋعا لايىق بىردەن-ءبىر وبەكت ەكەنىن جەتكىزدى.
ايتا كەتسەك, «ازىرەت سۇلتان» مەملەكەتتىك تاريحي-مادەني قورىق-مۋزەيىنە قاراستى رەسپۋبليكالىق ماڭىزى بار ەسكەرتكىشتەر قاتارىنا كىرەتىن ۇكاشا اتا كەسەنەسى مەن قۇدىعىندا سوڭعى جىلدارى جاڭا جوبالار مەن اباتتاندىرۋ جۇمىستارى قارقىن الۋدا. بىلتىر ۇكاشا اتا كەسەنەسى مەن قۇدىعىنىڭ اينالاسى تازارتىلىپ, ورىندىقتار قايتا جاسالدى. اۆتوتۇراققا جاڭادان ەلەكتر شامدارى تارتىلىپ, جارىقتاندىرىلدى. زياراتشىلار دەمالاتىن ورىندار حالىق يگىلىگىنە بەرىلدى. سونداي-اق مۋزەيلەندىرۋ جۇمىستارى بويىنشا «ۇكاشا اتا تاريحى» مۋزەيى كەلۋشىلەرگە ەسىگىن ايقارا اشتى. مۋزەي ەكسپوزيتسياسىنا ۇكاشا ساحابانىڭ ومىرىنەن سىر شەرتەتىن قۇندى مالىمەتتەر مەن 70-تەن استام ارحەولوگيالىق, ەتنوگرافيالىق, جازبا مادەنيەتىنە قاتىستى جادىگەرلەر قويىلدى. زياراتشىلاردىڭ وتىنىشتەرىن قاناعاتتاندىرۋ ماقساتىندا, وتىن, سۋ قوياتىن ۇلكەن باستىرما جاسالىپ, حالىق يگىلىگىنە بەرىلدى. بابا باسىنا باراتىن جۇرگىنشى جولدار قايتا جوندەلدى. قۇدىققا كوتەرىلەتىن جولعا مۇگەدەكتەرگە ارنالعان ارنايى جول سالىپ, پاندۋس ورناتىلدى. تازالىق جۇمىستارىنا بايلانىستى ارنايى قالدىق جاشىكتەر مەن ەسكەرتپە تاقتايشالارى قويىلىپ, ۇكاشا اتا كەسەنەسى ماڭىنا 100-دەن استام ماۋە اعاشتارى مەن شىرشا تالدارى جانە گۇلدەر وتىرعىزىلعان بولاتىن.
«ازىرەت سۇلتان» مەملەكەتتىك تاريحي-مادەني قورىق-مۋزەيى» رمقك قابىلداعان 2018-2021 جىلدارعان ارنالعان دامۋ جوسپارىنا سايكەس تاريحي ورىنداردى اباتتاندىرۋ, كەلگەن تۋريستەر مەن زياراتشىلارعا ساپالى قىزمەت كورسەتۋ بويىنشا بىرقاتار جۇمىستار دەمەۋشىلەردى تارتا وتىرىپ جۇزەگە اسۋدا.
تاريحي-كيەلى ورىنداردى اباتتاندىرۋ جانە مۋزەيلەندىرۋ جۇمىستارى الداعى ۋاقىتتا دا جالعاسىن تاباتىن بولادى.