بۇگىن سەناتتا مۇمكىندىگى شەكتەۋلى جانداردىڭ الەۋمەتتىك قورعالۋىن ارتتىرۋ ماسەلەسى تالقىلاندى. ماۋلەن اشىمباەۆ ەرەكشە قاجەتتىلىكتەرى بار ادامداردى قولداۋ – قوعامنىڭ دامۋى مەن كەمەلدەنۋ دەڭگەيىنىڭ ماڭىزدى كورسەتكىشى ەكەنىن ەسكە سالدى. الايدا, ەلىمىزدە مۇمكىندىگى شەكتەۋلى ادامداردىڭ ءومىر ءسۇرۋ ساپاسىن جاقسارتۋ بويىنشا جۇرگىزىلىپ جاتقان كەشەندى جۇمىستارعا قاراماستان, ءالى دە ءوز شەشىمىن تالاپ ەتەتىن ماسەلەلەر بار.
«مەملەكەت تاراپىنان قابىلدانعان شارالارعا قاراماستان, ەرەكشە قاجەتتىلىگى بار ازاماتتاردى الەۋمەتتىك قورعاۋدىڭ ءتيىمدى جۇيەسىن قۇرۋ ءالى دە بولسا وزەكتى. وعان ءتۇرلى ۇكىمەتتىك ەمەس ۇيىمداردان كەلىپ تۇسەتىن وتىنىشتەر دالەل. سوندىقتان ءبىز بۇگىنگى كەزدەسۋگە بارلىق مۇددەلى تۇلعالاردى: سەناتورلاردى, مەملەكەتتىك ورگانداردىڭ جانە وسى باعىتتاعى ۇيىمداردىڭ باسشىلارىن ارنايى شاقىردىق. ءبىز وزەكتى ماسەلەلەردى بىرلەسىپ تالقىلاپ, بۇل سالاداعى زاڭنامالاردى جەتىلدىرۋ جونىندە الداعى باعىت-باعداردى ايقىنداپ الۋىمىز كەرەك», دەدى سەنات توراعاسى.
ماۋلەن اشىمباەۆ سەناتقا مۇگەدەكتىگى بار ادامداردىڭ قۇقىقتارىن قورعاۋ جونىندەگى ۇيىمدار وكىلدەرىنىڭ وتىنىشتەرى ءجيى كەلىپ تۇسەتىنىن اتاپ ءوتتى. سوندىقتان سەناتورلار قوعام قايراتكەرلەرىمەن جانە وسى سالاداعى ساراپشىلارمەن كەزدەسۋ ۇيىمداستىرىپ كەلەدى. ال الداعى كەزەڭدە دەپۋتاتتىق كورپۋس قولدانىستاعى زاڭنامانى وزگەرتۋ اياسىندا ەرەكشە قاجەتتىلىكتەرى بار ازاماتتاردى قولداۋ تەتىكتەرىن مۇقيات پىسىقتاۋعا نيەتتەنىپ وتىر. ەنگىزىلەتىن جاڭا وزگەرىستەر تۋرالى ەڭبەك جانە حالىقتى الەۋمەتتىك قورعاۋ مينيسترى سەرىك شاپكەنوۆ ايتىپ بەردى.
ونىڭ ايتۋىنشا, 1 نەمەسە 2 توپتاعى مۇگەدەك بالالاردى تاربيەلەپ وتىرعان وتباسىلار, ءتىپتى وسى بالالار كامەلەتتىك جاسقا تولسا دا, تۇرعىن ۇي كەزەگىندە ءوز ورىندارىن ساقتاپ قالاتىنى كوزدەلىپ وتىر. ال 1 توپتاعى مۇگەدەكتەرگە كۇتىم جاسايتىن ادامدار جاردەماقى الا باستايدى.
"زاڭ جوباسىندا بالالاردى مۇگەدەكتىگى بويىنشا جاردەماقىلاردىڭ مولشەرىن قايتا قاراي وتىرىپ, 7 جاستان 16 جاسقا دەيىنگى مۇگەدەكتىك توپتار بويىنشا ءبولۋ, مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا جاردەماقىلاردى بىر مەزگىلدە الۋ قۇقىعىن بەرۋ, "ينۆاتاكسي" قىزمەتى پورتالىنا اۋىستىرۋ, سونداي-اق ارناۋلى الەۋمەتتىك قىزمەتتەر مەن جۇمىستا مەرتىككەن نەمەسە كاسىپتىك اۋرۋدان مۇگەدەك بولعان ادامداردى الەۋمەتتىك قولداۋ شارالارى كوزدەلگەن", دەپ اتاپ ءوتتى سەرىك شاپكەنوۆ.
قازىرگى ۋاقىتتا بۇل زاڭ جوباسى پارلامەنت دەپۋتاتتارىنىڭ قاراۋىندا جانە ەرەكشە قاجەتتىلىكتەرى بار ادامداردى قورعاۋ جانە قولداۋ سالاسىنداعى پروبلەمالاردى شەشۋگە باعىتتالعان.
كەزدەسۋدە سونداي-اق سەناتور اقمارال النازاروۆا ەرەكشە قاجەتتىلىكتەرى بار ادامداردى زاڭدى تۇردە كەمسىتۋدەن قورعاۋدى ۇسىندى.