ىندەت ىندەگەن ءبىر جىلدان استام ۋاقىتتا ءومىرىمىزدىڭ ءمانى وزگەردى. كارانتيندىك شەكتەۋلەر قۇرساۋىندا كوڭىلدىڭ ءبىر تۇسى كەم, ارينە. سوندىقتان ساقتىق شارالارىن ساقتاۋدىڭ وزىمىزگە دە, وزگەگە دە اسەرى مول ەكەنىن جەتە تۇسىنە باستاعاندايمىز. قولدانىسقا ەنگەن ءتۇرلى ۆاكتسينالار قالىپتى تىرشىلىگىمىزگە ورالاتىن كۇندى جاقىنداتا تۇسەدى دەگەن ءۇمىت بار. دەسە دە سوڭعى اپتادا ەل اۋماعىنداعى احۋال تاعى دا كۇردەلەنە ءتۇستى.
قازاقستاندا كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا ەل ايماقتارىنداعى ەپيدەميالىق جاعدايدى باعالاۋ ماتريتساسىن جاريالادى. 2021 جىلدىڭ 4 ساۋىرىندەگى جاعداي بويىنشا نۇر-سۇلتان, الماتى قالالارى مەن الماتى, اقتوبە, اتىراۋ جانە باتىس قازاقستان وبلىستارى «قىزىل ايماقتا» تۇر. «سارى ايماقتا» شىمكەنت قالاسى جانە اقمولا مەن قاراعاندى وبلىستارى ورنالاسقان. قالعان بارلىق ءوڭىر – «جاسىل ايماقتا». ەلىمىز تاياۋدا الەمدىك ەپيدەميالىق باعالاۋ ماتريتساسى بويىنشا «قىزىل ايماققا» وتكەن بولاتىن.
سوڭعى دەرەككە سايكەس قازاقستاندا 27 516 ادام كوروناۆيرۋس ينفەكتسياسىنان (26 180 كۆي+ جانە 1 336 كۆي-) ەم الىپ جاتىر. ونىڭ ىشىندە 9 996 پاتسيەنت ستاتسيوناردا, 17 520 ناۋقاس امبۋلاتورلىق دەڭگەيدە ەم قابىلداۋدا. كوروناۆيرۋسقا شالدىققاندار اراسىندا 398 ادامنىڭ جاعدايى اۋىر, 103 پاتسيەنتتىڭ جاعدايى وتە اۋىر, 64 ناۋقاس ءوجت اپپاراتىندا جاتىر. 2 ساۋىردە كوروناۆيرۋستان 11 ادام كوز جۇمعان.
قازىرگى ەڭ باستى ماقسات – حالىقتى يممۋنداۋ شارالارىن بەلسەندى جۇرگىزۋ. سوڭعى تاۋلىكتەردە ەلىمىزدىڭ ءار وڭىرىندە مىڭداعان ادامنىڭ ءوز ەركىمەن ەكپە الىپ جاتقانى قاۋىپكە قارسى كۇرەستى اركىمنىڭ وزىنەن باستاۋى قاجەتتىگىن جەتە ۇعىنعانى دەپ قابىلداۋعا بولار. وسى ورايدا وتاندىق كاسىپكەرلەردىڭ دە ورتاق ىسكە بىلەك سىبانا قاتىسۋى قۋانتادى. ماسەلەن, ەلوردادا بەلگىلى كاسىپكەرلەر ءىرى ساۋدا ورتالىقتارىنىڭ كينوتەاترلارىن, قوناقۇيلەرىن ەگۋ پۋنكتى رەتىندە پايدالانۋعا ۇسىنىپ وتىر. سانيتارلىق دارىگەرلەر مەن دەنساۋلىق ساقتاۋ باسقارمالارى ۆاكتسينالاۋعا قاجەتتى ينفراقۇرىلىمدى جاساقتاۋعا كىرىستى. كوپتەگەن ەگۋ پۋنكتى دەمالىسسىز جۇمىس ىستەمەك.