بۇگىن اۋىل شارۋاشىلىعى مينيسترلىگىنىڭ جەر رەفورماسى كوميسسياسىنىڭ ەكىنشى وتىرىسىندا ەكونوميكالىق جۇمىس توبىنىڭ جەتەكشىسى اقىلبەك كۇرىشباەۆ جۇمىس توبى وتىرىسىنىڭ ناتيجەلەرى تۋرالى ءسوز ەتتى, دەپ حابارلايدى Egemen.kz.
ەكونوميكالىق جۇمىس توبىنىڭ جەتەكشىسى اقىلبەك كۇرىشباەۆتىڭ ايتۋىنشا ەكونوميكالىق ماسەلەلەر بويىنشا جۇمىس توبىنىڭ وتىرىسىندا 6 ماسەلە قارالعان. وتىرىسقا جۇمىس توبىنىڭ 33 مۇشەسىنىڭ 30-ى قاتىسقان.
«قازىرگى ۋاقىتتا ەڭ وزەكتى ماسەلەنىڭ ءبىرى – جەر رەسۋرستارىن باقىلاۋ بويىنشا بىرىڭعاي مەملەكەتتىك جۇيەنى قۇرۋ. بۇگىندە اۋىل شارۋاشىلىعى مينيسترلىگىنىڭ جەر رەسۋرستارىن باسقاراتىن كوميتەتىندە تەك ورتالىق اپپارات قالعان. ول جەردە 38 ادام جۇمىس ىستەيدى. بارلىق ايماقتىق جەر ينسپەكتسيالارى 2014 جىلى اكىمدىكتەردىڭ قۇزىرىنا بەرىلگەن. ياعني, اكىم ءوزى جەر بەرەدى, جەردى ءوزى باقىلايدى. وسىعان بايلانىستى ءبىرىنشى قاراعان ماسەلەمىز - اكىمدىكتەردەن (جەرگىلىكتى اتقارۋشى ورگانداردان) جەردىڭ پايدالانىلۋى مەن قورعالۋىن مەملەكەتتىك باقىلاۋ جانە «ازاماتتارعا ارنالعان ۇكىمەت» مەملەكەتتىك كورپوراتسياسىنا مەملەكەتتىك جەر كاداسترىن جۇرگىزۋ فۋنكتسيالارىن بەرە وتىرىپ, جەر رەسۋرستارىن باسقارۋ اگەنتتىگىن قۇرۋ», دەدى ول.