پالاتا توراعاسى نۇرلان نىعماتۋلين گەرمانيا فەدەراتيۆتىك رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى تيلو يوحاننەس كليننەرمەن كەزدەستى, دەپ حابارلايدى Egemen.ءkz ماجىلىستىڭ ءباسپاسوز قىزمەتىنە سىلتەمە جاساپ.
تاراپتار ەكى ەل اراسىنداعى ىنتىماقتاستىقتى دامىتۋ توڭىرەگىندە ورتاق ويلارىمەن ءبولىستى. اسىرەسە پارلامەنتارالىق ءوزارا ءىس-قيمىلدى نىعايتۋعا كوڭىل ءبولىندى. قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ گەرمانيانى ەۋروپالىق وداق شەڭبەرىندەگى قازاقستاننىڭ ماڭىزدى ستراتەگيالىق ارىپتەسى رەتىندە قاراپ, ەكى ەل اراسىنداعى ىنتىماقتاستىقتى دامىتۋعا زور كوڭىل بولگەنىن العا تارتقان ءماجىلىس سپيكەرى قازاقستاننىڭ قازىرگى پرەزيدەنتى قاسىم-جومارت توقاەۆتىڭ گەرمانياعا ساپارى ەكىجاقتى بايلانىستى ودان ءارى تەرەڭدەتۋگە زور ىقپال ەتكەنىن اتاپ ءوتتى.
الداعى جىلى ديپلوماتيالىق قاتىناستىڭ ورناعانىنا 30 جىل تولادى. نۇرلان نىعماتۋليننىڭ پىكىرىنشە, وسى ارالىقتا قوس مەملەكەت اراسىندا سەنىمدى ساياسي ديالوگ ورناپ, قاجەتتى قۇقىقتىق بازا قالىپتاسىپ, ساۋدا-ەكونوميكالىق ءارى مادەني-گۋمانيتارلىق ىقپالداستىق قارقىندى دامىدى.
ن. نىعماتۋلين قازاقستان ەكىجاقتى قارىم-قاتىناستى نىعايتۋعا مۇددەلى ەكەنىن ايتا كەلىپ, وسى جولدا زاڭنامالىق ورگاندار اراسىنداعى ىنتىماقتاستىقتىڭ ماڭىزدىلىعىنا توقتالدى. وسى ورايدا ەكى ەلدىڭ پارلامەنتتىك دەلەگاتسيالارىنىڭ ءجيى ءىس-ساپارلار مەن كەزدەسۋلەر ۇيىمداستىرۋى پارلامەنتارالىق ديالوگتى نىعايتا وتىرىپ, قازاقستان مەن گەرمانيا اراسىنداعى سەنىم مەن ارىپتەستىكتى دامىتۋعا باعىتتالعان ناقتى قادام دەۋگە بولادى.
ءوز كەزەگىندە ت. كليننەر قازاقستان گەرمانيانىڭ وڭتايلى ساۋدا-ەكونوميكالىق ارىپتەستەرىنىڭ ءبىرى ەكەنىن جانە ەكى ەل باسشىلارىنىڭ كەزدەسۋى ەلدەر اراسىنداعى ىقپالداستىقتى جاڭا دەڭگەيگە شىعارۋعا سەرپىن بەرگەنىن ايتتى.
كەزدەسۋ بارىسىندا ءماجىلىس توراعاسى بەيىندى كوميتەتتەر مەن پارلامەنتارالىق توپتار شەڭبەرىندە ءىس-ساپارلار ارقىلى زاڭنامالىق تاجىريبە الماسۋدى ودان ءارى ىنتالاندىرۋ قاجەتتىلىگىنە توقتالدى.