ەل تاۋەلسىزدىگىنىڭ 30 جىلدىعىنا وراي ۇلتتىق اكادەميالىق كىتاپحانا قازاقستان – شۆەتسيا كورولدىگىندەگى ەلشىلىگىمەن بىرلەسىپ, قازاق پوەزياسىنىڭ كورنەكتى تۇلعالارى جامبىل جاباەۆتىڭ 175 جىلدىعى مەن مۇقاعالي ماقاتاەۆتىڭ 90 جىلدىعىنا ارنالعان «ۇلت ماقتانىشتارى» اتتى ونلاين فورماتتا حالىقارالىق دوڭگەلەك ۇستەل وتكىزدى.
قازاقستان مەن شۆەتسيا كورولدىگىنىڭ شىعارماشىلىق زيالى قاۋىم وكىلدەرىن بىرىكتىرگەن ءىس-شارا جىر الىبى جامبىل جاباەۆ پەن اقيىق اقىن مۇقاعالي ماقاتاەۆتىڭ الەمدىك ادەبيەت پەن مادەنيەتكە قوسقان ۇلەسىن زەرتتەۋ جانە ولاردىڭ ءومىرى مەن شىعارماشىلىعىنىڭ اسپەكتىلەرىن زەردەلەۋ ماقساتىندا ۇيىمداستىرىلدى.
ادەبي جيىنعا قازاقستان – شۆەتسيا كورولدىگىندەگى توتەنشە جانە وكىلەتتى ەلشىسى سەرگەي نۇرتاەۆ, شۆەتسياداعى قازاقستاندىق جاستار قاۋىمداستىعىنىڭ وكىلدەرى رەگينا شەپەتيا-لارسسون, دينارا سابدەنوۆا, ۇعا اكادەميگى ءۋاليحان قاليجان ۇلى, ۇلتتىق اكادەميالىق كىتاپحانا باسشىسى ءۇمىتحان مۇڭالباەۆا, فيلولوگيا عىلىمدارىنىڭ دوكتورى, اقىن باۋىرجان جاقىپ, فيلولوگيا عىلىمدارىنىڭ دوكتورى سۆەتلانا انانەۆا قاتىستى.
ەكى ەلدىڭ شىعارماشىلىق ينتەلليگەنتسيا وكىلدەرىنىڭ باسىن قوسقان شارانىڭ رۋحاني ءھام ادەبي ماڭىزى زور ەكەنىن اتاپ وتكەن قازاقستان رەسپۋبليكاسىنىڭ شۆەتسيا كورولدىگىندەگى توتەنشە جانە وكىلەتتى ەلشىسى سەرگەي نۇرتاەۆ: «مەملەكەت باسشىسى قاسىم-جومارت توقاەۆ «تاۋەلسىزدىك – بارىنەن قىمبات» ماقالاسىندا ناۋرىز مەرەكەسىن تويلاۋدا تۇجىرىمدامالىق تاسىلدەردىڭ ماڭىزدىلىعىنا توقتالدى. ياعني ناۋرىز قارساڭىنداعى ءار ءىس-شارا حالىقتىڭ مادەني-رۋحاني ۇلەسى ءۇشىن ءتۇرلى ماڭىزعا يە بولۋى كەرەك. ۇلتىمىزدىڭ يمپروۆيزاتور اقىنى جامبىل جاباەۆ پەن مۇقاعالي ماقاتاەۆ قازاق رۋحانياتىنا وراسان زور ەڭبەك ءسىڭىردى. بۇگىنگى جاستاردىڭ وسىنداي كورنەكتى اقىنداردىڭ شىعارماشىلىعىنا قىزىعىپ, قۇرمەت كورسەتىپ جاتقانىنا وتە قۋانىشتىمىن. سونداي-اق جاس اۆتورلارعا جاڭا تىنىس, جاڭا تابىس تىلەيمىن», دەدى.
ال ءۋاليحان قاليجان ۇلى جامبىلدىڭ جەكە تۇلعاسىنا توقتالىپ, اقىننىڭ ۇلتتىق برەندكە اينالاتىنىن ايتتى. «جامبىل – اقىل-ويدىڭ العىرى, وزگەگە ۇقسامايتىن دارا, وقشاۋ بەت-بەينەسى اسا زور قۇبىلىس. ول ەپيك اقىن, ايتىس اقىنى ءارى ازاماتتىق ولەڭدەردىڭ اقىنى. ۇلىنى ۇلى عانا تانيدى: اۋەزوۆ مويىنداعان, سەيفۋللين باس يگەن, ءسابيت مۇقانوۆ ارداقتاعان, روللان سالەم سالعان. تاريح دوڭعالاعى كەرى كەتپەيدى. تاۋەلسىز قازاقستاندا جامبىل بابامىز ۇلتتىق برەندكە اينالا بەرەدى. جامبىل پوەزياسى – شىنشىل پوەزيا. ءومىردى ولەڭمەن ورنەكتەگەن اقىن قازاق تۇرمىسىنىڭ, قازاق قوعامىنىڭ ادىلەتسىز بولمىسىن اشكەرەلەگەن ولەڭدەرى ونىڭ اتىن شىعاردى», دەدى ول.