ەلباسى نۇرسۇلتان نازارباەۆ قورىنىڭ قامقورلىعىمەن ورىستەتىلگەن «تەپە-تەڭدىك» الەۋمەتتىك جوباسى اقمول اۋىلىندا جۇزەگە اسىرىلا باستادى.
شالعاي اۋىلدارداعى كوپتەن قوردالانىپ قالعان ماڭىزدى ماسەلەنىڭ ءبىرى – مۇمكىندىگى شەكتەۋلى ادامدارعا, ونىڭ ىشىندە جاستارعا كاسىبي باعدار بەرۋ. كەي-كەيدە ون ەكى مۇشەسى ساۋ ادامدار دا ەكى قولعا ءبىر كۇرەك تابا المايتىنى بار. ەل ىشىندەگى مۇمكىندىگى شەكتەۋلى جاستار اراسىندا بەلگىلى ءبىر ماماندىق الساق, ءتاپ-ءتاۋىر تابىسى بار جۇمىس ىستەسەك دەپ العا ۇمتىلاتىندار از ەمەس. ونىڭ ۇستىنە كاسىبي جاعىنان دايارلايتىن وقۋ ورىندارى دا جوق. بۇل جوبانىڭ باستى ماقساتى – ولاردىڭ الەۋمەتتىك-تۇرمىستىق جاعدايىن جاقسارتۋ. ول ءۇشىن جاستارعا قولىنان كەلەر كاسىپتىڭ قىر-سىرىن مەڭگەرتىپ, تاعدىردىڭ سالعان ىسىنە مويىماي, ءوزىن-ءوزى شىڭداي دامىتۋعا جول اشۋ. ەلمەن ارالاسىپ, تىربانىپ تىرشىلىك ىستەسە, كىرپىش دۇنيەنىڭ كەتىگىنە جاراعاندارىن دا قۋانىش كورىپ, كوڭىلدەرىن دەمدەيدى ءارى ومىرگە بەيىمدەلەدى.
جوبا اياسىندا «باتىر» قوعامدىق بىرلەستىگىنىڭ «تۇلعانى دامىتۋ ورتالىعى» بازاسى تۇراقتى تۇردە مۇمكىندىگى شەكتەۋلى ادامداردى بەلگىلى ءبىر كاسىپكە دايارلاپ, كەيىن جۇمىسقا ورنالاستىرماق. ورتالىق قاجەتتى تىگىن ماشيناسى, كومپيۋتەر ءتارىزدى قۇرالدارمەن جابدىقتالعان. قولى ەپسەكتى ادامداردىڭ ايى وڭىنان تۋماق. ايتالىق, تىگىن ءىسى, شاشتاراز, ءداستۇرلى حالىقتىق قولونەر, اعاش, تەرى وڭدەۋ, كومپيۋتەرلىك ساۋاتتىلىق باعىتىندا باستاپقى ءبىلىمىن جيناقتاپ, تاجىريبەلەرىن تولىقتىرا الادى. ارعى جاعى وزدەرىنە بايلانىستى.
جالپاق الەمدى جامان ىندەت يەكتەپ, القىمىڭنان الىپ تۇرعان ۋاقىتتا مۇمكىندىگى شەكتەۋلى ادامداردىڭ دا قاتاردان قالماي قارەكەت ەتۋىنە قامقورلىق جاسالۋى ادامي تۇرعىدان العاندا يماندى شارۋا ەكەندىگى ءسوزسىز. اقمول اۋىلىندا باستالعان اقجارىلقاپ باستامانىڭ باعالى بولاتىندىعى دا سوندىقتان.
اقمولا وبلىسى,
تسەلينوگراد اۋدانى