سولتۇستىك قازاقستانداعى قىزىلجار اۋدانىنىڭ لەسنوي اۋىلدىق وكرۋگىنىڭ ۋچاسكەلىك پوليتسيا ينسپەكتورى ساعيدوللا ەتەكباەۆ زاڭسىز اڭشىلىق فاكتىسىن انىقتاعان, دەپ حابارلايدى Polisia.kz.
ۋچاسكەلىك پوليتسيا ينسپەكتورى 28 ناۋرىز كۇنى ساعات 21:30 شاماسىندا اۋىلداعى اۆتوجولمەن ءوتىپ بارا جاتقان كەزدە جولدىڭ شەتىنە توقتاعان 64 جاستاعى اۋىل تۇرعىنىنىڭ «ۆاز» ماركالى اۆتوكولىگىن بايقاعان. پوليتسەي توقتاپ, قانداي كومەك قاجەت ەكەندىگىن سۇراعان. ەر ادام كولىكتىڭ سىنىپ قالعانى, ۇلىنىڭ قاجەتتى بولشەكتى اكەلە جاتقانى جايلى ايتقان. الايدا ۋچاسكەلىك ينسپەكتور شەتتە تۇرعان جاس جىگىتتى بايقاعان. ول 29 جاستاعى جىگىتتىڭ كولىككە ءسىبىر ەلىگىنىڭ ءولى دەنەسىن سۇيرەپ بارا جاتقانىن كورگەن. ۋچاسكەلىك ينسپەكتور وقيعا ورنىنا دەرەۋ جەدەل-تەرگەۋ توبىن شاقىرعان. كولىكتەن 12 كاليبرلى تەگىس ۇڭعىلى قارۋ الىندى. اتالعان فاكت قر قىلمىستىق كودەكسىنىڭ 337-بابى (زاڭسىز اڭشىلىق) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىنە ەنگىزىلدى.
– كۇدىكتىلەردىڭ ۇلكەنىنىڭ ايتۋىنشا, ول قارۋدىڭ سەرىپپەسىن اۋىستىرىپ, تەكسەرىپ كورمەك بولعان. ۇلىمەن ورمانعا بارعاندا ونىڭ كوزىنە ەلىك ىلىككەن. تەرگەۋ ارەكەتتەرى جۇرگىزىلۋدە, قاجەتتى ساراپتامالار تاعايىندالدى. بۇل جىل باسىنان بەرى اۋداندا انىقتالعان زاڭسىز اڭ اۋلاۋدىڭ العاشقى دەرەگى. ءوڭىر تۇرعىندارىنا اڭ اۋلاۋ ماۋسىمىنىڭ وتكەن جىلدىڭ جەلتوقسان ايىندا جابىلعانى جايلى ەسكەرتەمىز. اڭشىلاردان زاڭنامانى قاتاڭ ساقتاۋدى سۇرايمىز, – دەدى قىزىلجار اۋدانىنىڭ پب باستىعىنىڭ مىندەتىن اتقارۋشى پيوتر كليموۆ.