قوستانايدا KIA اۆتوموبيلدەرى قۇراستىرىلا باستادى. بۇگىن وڭىرگە جۇمىس ساپارىمەن كەلگەن قر پرەمەر-ءمينيسترى اسقار مامين مەن «KIA Motors روسسيا ي سنگ» جشق پرەزيدەنتى كيم دجين حا «سارىارقااۆتوپروم» جشس زاۋىتىندا KIA وندىرىستىك جەلىسىنىڭ اشىلۋ راسىمىنە قاتىستى.
وتاندىق اۆتوكولىك وندىرىسىنە تىڭ سەرپىن بەرەتىن جاڭا جوبا جونىندە قر پرەمەر-ءمينيسترىنىڭ رەسمي اقپاراتتىق رەسۋرسى مالىمدەدى.
جوبا شەڭبەرىندە جىلىنا 20 مىڭ KIA اۆتوموبيلدەرىن شىعارۋ جوسپارلانعان. ءونىمدى وقشاۋلاۋ دەڭگەيى شاناقتاردى دانەكەرلەۋ جانە بوياۋ وپەراتسيالارىن قوسا العاندا, ۇساق توراپتى ءوندىرىس تەحنولوگيالارىن قولدانۋ ارقىلى 50%-عا دەيىن ارتتىرىلاتىن بولادى. «اۆتوموبيل جاساۋ قازاقستاننىڭ يندۋستريالىق دامۋىنىڭ ستراتەگيالىق ماڭىزدى باعىتتارىنىڭ ءبىرى جانە ول جىل سايىن وڭ ديناميكانى كورسەتىپ كەلە جاتىر», دەدى ا. مامين.
پرەمەر-مينيستر, سونىمەن قاتار, «KamLitKZ» شويىن قۇيماسىن ءوندىرۋ زاۋىتىنىڭ قۇرىلىس بارىسىمەن تانىستى. قۇرىلىستىڭ ءبىرىنشى كەزەڭىن 2021 جىلدىڭ قازان ايىندا, ەكىنشى جانە ءۇشىنشى كەزەڭدەرىن 2023 جىلى اياقتاۋ جوسپارلانعان. جوبانىڭ قۇنى 80 ملرد تەڭگەنى قۇرايدى. 300 جاڭا جۇمىس ورنى قۇرىلادى. جوبالىق قۋاتىنا قول جەتكىزگەن سوڭ وندىرىستە ك5 جاڭا بۋىننىڭ جۇك كولىكتەرىنە ارنالعان جەتەك كارتەرلەرى, تسيليندر بلوكتارى مەن قوزعالتقىش ءتسيليندرى بلوكتارىنىڭ باستيەكتەرى شىعارىلىپ, جالپى كولەمى جىلىنا 40 مىڭ توننادان استام شويىن قۇيماسىن قۇرايتىن بولادى. جوبانى ىسكە اسىرۋ قازاقستاندى «كاماز» جاق جەتكىزۋشىلەرىنىڭ جاھاندىق تەحنولوگيالىق تىزبەگىنە ەنگىزەدى -ء ونىمنىڭ 95%-ى ەكسپورتتالاتىن بولادى.
ۇكىمەت باسشىسى قر اۋماعىندا شىعارىلاتىن اۋىل شارۋاشىلىعى تەحنيكاسىنداعى قازاقستاندىق قامتۋ دەڭگەيىن ەداۋىر ارتتىرۋعا باعىتتالعان «اگروماشحولدينگ» اق وقشاۋلاۋ ورتالىعىندا بولدى. 36 مىڭ شارشى مەتر اۋماقتا مەتالدى لازەرمەن كەسۋگە, مايىستىرۋعا, سىرلاۋعا جانە دانەكەرلەۋگە, پلاستيك بۇيىمدارىن, ينتەرەر بولشەكتەرىن, تەرموشۋوقشاۋلاعىشتى وندىرۋگە, كونۆەيەرلىك قۇراستىرۋعا جانە ت.ب. ارنالعان اۆتوماتتاندىرىلعان جەلىلەر ورناتىلعان. بۇل جابدىقتار «ونەركاسىپتى دامىتۋ قورى» اق قارجى قۇرالدارى ارقىلى ساتىپ الىندى. جاقىندا وقشاۋلاۋ ورتالىعىندا اۋىل شارۋاشىلىعى تەحنيكاسىنا ارنالعان كومپونەنتتەردىڭ 1200-دەن استام اتاۋى, سونداي-اق «كيروۆەتس», «Essil», «Lovol», «Pottinger», «Deutz-Fahr», JAC, Chevrolet برەندتەرىنىڭ جانە ت. ب. اۆتوموبيل ونەركاسىبى اتاۋلارى شىعارىلاتىن بولادى.
پرەمەر-مينيستر «كاماز», «تاتنەفت», «اۆتوۆاز» جانە «KIA Motors» كومپانيالارىنىڭ باسشىلىعىمەن اۆتوموبيل جاساۋ سالاسىنداعى ىنتىماقتاستىقتى ودان ءارى دامىتۋ پەرسپەكتيۆالارىن تالقىلادى. قازاقستاندا اۋىل شارۋاشىلىعى تەحنيكاسى ءوندىرىسىن جەرگىلىكتەندىرۋدى ارتتىرۋ ماسەلەلەرى «پەتەربۋرگ تراكتور زاۋىتى» اق, بەلارۋستىك «گومسەلماش» ااق جانە يتاليالىق «SDF Group» باسشىلىعىمەن كەزدەسۋلەردە قارالدى.
كەلىسسوزدەر قورىتىندىسى بويىنشا ا. ءماميننىڭ قاتىسۋىمەن اۆتوموبيل جاساۋدا بىرلەسكەن جوبالاردى ىسكە اسىرۋ بويىنشا 9 قۇجاتقا, ونىڭ ىشىندە ونەركاسىپتىك قۇراستىرۋ تۋرالى كەلىسىمدەرگە, ينۆەستيتسيالىق كەلىسىمدەرگە جانە ارنايى ينۆەستيتسيالىق كەلىسىمشارتتارعا قول قويىلدى.
جۇمىس ساپارى اياسىندا پرەمەر-مينيستر وڭىردەگى اوك, اۋىل شارۋاشىلىعى ماشينالارىن جاساۋ سالاسىندا ىسكە اسىرىلىپ جاتقان جوبالارمەن, سونداي-اق «نۇرلى جەر» مەملەكەتتىك باعدارلاماسى بويىنشا تۇرعىن ءۇي ينفراقۇرىلىمىن دامىتۋ بارىسىمەن تانىستى.