كادر رەزەرۆىنە قاتىسۋعا 1 650 قازاقستاندىق ءوتىنىم بەردى. ەسكە سالا كەتەيىك, اتالعان جوبانىڭ ىسكە قوسىلعانى تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسى 1 ناۋرىزدا جاريالاعان بولاتىن, تىلەك بىلدىرۋشىلەردىڭ 12 كۇن ىشىندە جەكە دەرەكتەرىن تولتىرىپ, بىلىكتىلىگى تۋرالى قۇجاتتاردى تاپسىرۋ مۇمكىندىگى بولدى.
تەستىلەۋدىڭ ءبىرىنشى كەزەڭىنەن 1 246 ادام ءوتتى, ۇمىتكەرلەر لوگيكالىق تەستىلەۋدىڭ 78 سۇراعىنا جاۋاپ بەردى. كەلەسى كەزەڭگە ساۋالداردىڭ 30%-ىنا دۇرىس جاۋاپ بەرگەن 1 067 ۇمىتكەر جىبەرىلدى.
جوباعا تىركەلگەندەردىڭ اراسىندا نۇر-سۇلتان قالاسى مەن الماتى وبلىسىنىڭ تۇرعىندارى باسىم (25%-دان استام), ەڭ از ءوتىنىم پاۆلودار وبلىسىنان كەلىپ تۇسكەن. دارىندىلار پۋلىنا قاتىسۋشىلاردىڭ 8%-دان استامىنىڭ 10 جىلدان استام جۇمىس ءوتىلى بار. ىرىكتەۋدىڭ ءبىرىنشى كەزەڭىنەن وتكەن ۇمىتكەرلەردىڭ قورىتىندى ءتىزىمى talent.gov4c.kz سايتىندا جاريالانعان.
تەستىلەۋدىڭ ەكىنشى كەزەڭىندە ۇمىتكەرلەردىڭ قازاقستان رەسپۋبليكاسىنىڭ زاڭناماسى بويىنشا ءبىلىمى تەكسەرىلەدى. قاتىسۋشىلار ەل كونستيتۋتسياسى, «مەملەكەتتىك قىزمەتتەر تۋرالى», «دەربەس دەرەكتەر تۋرالى», «سىبايلاس جەمقورلىققا قارسى ءىس-قيمىل تۋرالى», «جەكە جانە زاڭدى تۇلعالاردىڭ وتىنىشتەرى تۋرالى» جانە «اكتسيونەرلىك قوعامدار تۋرالى» زاڭدار بويىنشا 1,5 ساعات ىشىندە 90 سۇراققا جاۋاپ بەرۋى قاجەت.
تەستىلەۋدەن كەيىن قورىتىندى كەزەڭگە وتكەن ۇمىتكەرلەر مەملەكەتتىك جانە قوعام قايراتكەرلەرىنەن, HR-ساراپشىلاردان جانە مەملەكەتتىك كورپوراتسيانىڭ باسقارما مۇشەلەرىنەن تۇراتىن ساراپشى كەڭەس مۇشەلەرىمەن اڭگىمەلەسۋدەن وتەتىن بولادى. جوعارى بالل جيناعان جانە اڭگىمەلەسۋ كەزەڭىنەن ءساتتى وتكەن ۇمىتكەرلەر كەيىننەن ءتيىستى بوس لاۋازىمدارعا تاعايىنداۋ ءۇشىن دارىندىلار پۋلىنا قابىلدانادى.