ۇلىستىڭ ۇلى كۇنى قارساڭىندا قوستاناي قالاسىنىڭ تۇرعىنى, وڭىرگە بەلگىلى قولونەر شەبەرى رايحان راحاليەۆا وبلىستىق تاريحي-ولكەتانۋ مۋزەيىنە ۇزىندىعى 21 مەتر بولاتىن ەرەكشە كورپەنى سىيعا تارتتى.
ەرەكشە تارتۋ ناۋرىز مەرەكەسىنە وراي مۋزەي قىزمەتكەرلەرى ۇيىمداستىرعان كورپەلەر كورمەسىنىڭ كوزايىم ەكسپوناتىنا اينالدى. «21 سانى – ءۇش جەتىدەن تۇراتىن نىشاندىق بەلگى. جەتى اتا, جەتى قازىنا, جەتى عالام, جەتى قات جەر, جەتى امال, جەتى كۇن سياقتى حالىق ۇعىمدارىنداعى كيەلى 7 سانىنىڭ ورنى ەرەكشە. ناۋرىز كوجە دە 7 دامنەن تۇرادى» دەيدى شەبەر.
ون ساۋساعىنان ونەر تامعان ىسمەردىڭ قولىنان شىققان ۇزىن كورپە قوشقار ءمۇيىز ويۋىمەن كەستەلەنىپ, قىزىل-جاسىل ءتۇستى ماساتى ماتامەن تىستالعان.
35 جىل بويى قولونەردى سەرىك ەتكەن رايحان راحاليەۆا تىككەن ءساندى ۇلتتىق كيىم ۇلگىلەرى مەن قورجىن, شابادان, قۇس جاستىق, كورپەشە سياقتى تۇرمىستىق بۇيىمداردى تۇرعىندار اتتاي قالاپ الىپ كەتىپ جاتادى. ىسمەردىڭ قولىنان شىققان ونەر تۋىندىلارى قازاقستان, رەسەي, اقش, تۇركيا, يتاليا مەملەكەتتەرىندەگى جەكە كوللەكتسيالاردىڭ تورىنەن ورىن العان.
شەبەر الداعى ۋاقىتتا گيننەستىڭ رەكوردتار كىتابىنا ەنەتىن ەڭ ۇزىن كورپە قۇراستىرىپ شىعارۋدى كوزدەپ وتىر.
قوستاناي وبلىسى