قر پرەمەر-ءمينيسترى اسقار ءماميننىڭ توراعالىعىمەن قر پارلامەنتى ءماجىلىسىنىڭ توراعاسى نۇرلان نىعماتۋليننىڭ قاتىسۋىمەن جاڭعىرتۋ جونىندەگى ۇلتتىق كوميسسيانىڭ وتىرىسى ءوتتى, دەپ حابارلايدى ەgemen.kz
قر تۇڭعىش پرەزيدەنتى – ەلباسى نۇرسۇلتان نازارباەۆتىڭ بەس ينستيتۋتسيونالدىق رەفورماسىن ىسكە اسىرۋ جونىندەگى «100 ناقتى قادام» ۇلت جوسپارىنىڭ جانە مەملەكەت باسشىسى قاسىم-جومارت توقاەۆتىڭ 2020 جىلعى 1 قىركۇيەكتەگى قازاقستان حالقىنا جولداۋىنىڭ ورىندالۋ بارىسى قارالدى.
اتقارىلىپ جاتقان جۇمىستار تۋرالى ۇلتتىق ەكونوميكا ءمينيسترى اسەت ەرعاليەۆ, اۋىل شارۋاشىلىعى ءمينيسترى ساپارحان وماروۆ, قارجى ءمينيسترى ەرۇلان جاماۋباەۆ, ەنەرگەتيكا ءمينيسترى نۇرلان نوعاەۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ, دەنساۋلىق ساقتاۋ ءمينيسترى الەكسەي تسوي, ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ, مادەنيەت جانە سپورت ۆيتسە-ءمينيسترى عابيدوللا ءابدىراحىموۆ جانە باسقا دا جاۋاپتى تۇلعالار باياندادى.
بۇگىنگى تاڭدا ۇلت جوسپارىنىڭ 100 قادامىنىڭ ىشىندە 72 قادام ىسكە اسىرىلدى: «كاسىبي مەملەكەتتىك اپپارات قۇرۋ» باعىتى بويىنشا – 15 قادامنىڭ 13-ءى, «زاڭنىڭ ۇستەمدىگىن قامتاماسىز ەتۋ» باعىتى بويىنشا – بارلىق 19 قادام, «يندۋستريالاندىرۋ جانە ەكونوميكالىق ءوسىم» باعىتى بويىنشا – 50 قادامنىڭ 27-ءسى, «بىرتەكتىلىك جانە بىرلىك» باعىتى بويىنشا – 6 قادامنىڭ 3-ءۋى, «ەسەپ بەرەتىن مەملەكەتتى قالىپتاستىرۋ» باعىتى بويىنشا – بارلىق 10 قادام.
بيىل «كاسىبي مەملەكەتتىك اپپارات قۇرۋ» جانە «يندۋستريالاندىرۋ جانە ەكونوميكالىق ءوسۋ» باعىتتارى بويىنشا 9 قادامدى ورىنداۋ جوسپارلانۋدا.
وتىرىستا بيۋدجەتتەن تىس قورلاردىڭ قىزمەتىن قامتيتىن «كەڭەيتىلگەن بيۋدجەتتى» ەنگىزۋ, زەينەتاقى مەن جاردەماقىنى تاعايىنداۋ جانە تولەۋ پروتسەستەرىن تسيفرلاندىرۋ, وتاندىق فارماتسەۆتيكانى دامىتۋ, الەۋمەتتىك كودەكستىڭ تۇجىرىمداماسىن جانە قازاقستاننىڭ 2050 جىلعا دەيىنگى تومەن كومىرتەكتى دامۋ تۇجىرىمداماسىن ازىرلەۋ ماسەلەلەرى قارالدى.
پرەمەر-مينيستر ۇلت جوسپارىن جانە قر پرەزيدەنتى قاسىم-جومارت توقاەۆتىڭ 2020 جىلعى 1 قىركۇيەكتەگى جولداۋىن ىسكە اسىرۋ جونىندەگى جالپىۇلتتىق شارالار جوسپارىن تولىق جانە ساپالى ورىنداۋ بويىنشا بەلسەندى جۇمىستى جالعاستىرۋدى تاپسىردى.
ستراتەگيالىق ينۆەستورلاردى, ءبىرىنشى كەزەكتە, جاڭا جۇمىس ورىندارىن قۇرۋدى قامتاماسىز ەتەتىن ەكونوميكانىڭ باسىم سەكتورلارىنداعى جاڭا ءىرى جوبالارعا تارتۋ جونىندەگى تارماقتارعا ەرەكشە نازار اۋدارىلدى.