تۇركىستان وبلىسىنىڭ پوليتسەيلەرى زاڭسىز بالىق اۋلاعان براكونەردى ۇستادى, دەپ حابارلايدى Polisia.kz.
جەتىساي اۋدانى اۋماعىنداعى توعايلىق القاپتار مەن وزەن-سۋلاردا زاڭسىز بالىق اۋلاۋ دەرەكتەرىن انىقتاۋ, الدىن الۋ ماقساتىندا جەتىساي اپب جپق قىزمەتكەرلەرىمەن رەيدتىك-پروفيلاكتيكالىق ءىس-شارالار ۇنەمى وتكىزىلىپ وتىرادى. وسىنداي كەزەكتى تەكسەرۋ كەزىندە پوليتسەيلەر, ۇتىرتوبە اۋىلىنا قاراستى شاردارا سۋ قويماسى ماڭىندا جەرگىلىكتى تۇرعىننىڭ زاڭسىز تۇردە شانىشقى (استراگا) پايدالانا وتىرىپ, بالىق اۋلاپ وتىرعانىن انىقتادى. ۇستالعان جىگىتتەن ايعاقتى زات رەتىندە ءبىر دانا رەزەڭكە قايىق, ءۇش مەترلى شانىشقى (استراگا) جانە 50 دانادان استام زاڭسىز اۋلانعان بالىق تاركىلەنىپ الىندى. بالىقتاردىڭ جالپى سالماعى 93 كەلىنى قۇرادى.
اتالعان جايت قر قك-ءنىڭ 335 بابىمەن (بالىق رەسۋرستارىن, باسقا دا سۋ جانۋارلارىن نەمەسە وسىمدىكتەردى زاڭسىز اۋلاۋ) تىركەلىپ, سدتتبت-نە قىلمىستىق ءىس ەنگىزىلىپ, سوتقا دەيىنگى تەرگەپ-تەكسەرۋ امالدارى باستالدى. تابيعاتقا زالال كەلتىرگەن تۇرعىن جەتىساي اپب-نە جەتكىزىلدى. باس شاراسى “كەلۋ تۋرالى مىندەتتەمە”.
ءوز كەزەگىندە تۇركىستان وبلىسىنىڭ پوليتسەيلەرى ازاماتتارعا زاڭسىز بالىق اۋلاپ, سونداي-اق قىزىل كىتاپقا ەنگىزىلگەن جانۋارلار مەن وسىمدىكتەردى جويۋدىڭ سوڭى زاڭ اياسىندا جاۋاپقا تارتىلۋعا اكەلىپ سوعاتىنىن ەسكەرتەدى.