قوستانايداعى ىبىراي التىنسارين مەموريالدىق مۋزەيى مەرەكە قارساڭىندا ناۋرىز تاريحى مەن ۇلتتىق سالت-ءداستۇردى ناسيحاتتايتىن تانىمدىق جوبالاردى قولعا الىپ وتىر.
– مۋزەي قىزمەتكەرلەرى 10 ناۋرىزدان بەرى ناۋرىزعا قاتىستى تاقىرىپتىق ءىس-شارالاردى ۇيىمداستىرىپ, الۋان تاقىرىپتى قامتيتىن ەكسكۋرسيالار مەن دارىستەر, كورمەلەر, كەزدەسۋلەر وتكىزۋدە. اپتانىڭ باسىندا ءبىز مۇمكىندىگى شەكتەۋلى بالعىنداردى قوناققا شاقىرىپ, ۇلىستىڭ ۇلى كۇنىنە بايلانىستى قىزىقتى اڭگىمە وتكىزدىك. مۋزەيدىڭ ءبىر زالىنا كەرەگە قۇرىپ, اشىق كيىز ءۇي سياقتى ەتىپ, داستارقان جايىپ, بالالارعا ۇلتتىق تاعامداردان ءدام تاتىردىق, – دەيدى مۋزەي قىزمەتكەرلەرى.
مۋزەيدە بىرنەشە كۇننەن بەرى « ۇلى دالانىڭ ۇلى مەيرامى» اتتى مەرەكەلىك ءىس-شارالار توپتاماسى ءوتىپ جاتىر.
– ۇجىم بولىپ ءوز كۇشىمىزبەن ۇلتتىق سالت-داستۇرلەرىمىز بەن ۇلتتىق ويىندارىمىزدى, ايتىسىمىزدى, ءان شاشۋىمىزدى ارالاستىرىپ تەاترلاندىرىلعان كورىنىس دايىندادىق, – دەدى مۋزەي باسشىسىنىڭ ورىنباسارى سالتانات وتەلباەۆا.
اتالعان ۇجىم بيىل تاۋەلسىزدىكتىڭ 30 جىلدىعى مەن ۇلى اعارتۋشى ىبىراي ءالتىنساريننىڭ 180 جىلدىعىنا ارنالعان كوپتەگەن يگى جوبالاردى جۇزەگە اسىرۋدى كوزدەپ وتىر. ماسەلەن, مۋزەيدە ناۋرىزعا ارنالعان مەرەكەلىك شارالار اياسىندا «ىبىراي جىلى» كۇنتىزبەسىنىڭ تۇساۋى كەسىلدى.
قوستاناي وبلىسى