قوستاناي وبلىسىنىڭ ديقاندارى كوكتەمگى ەگىس ناۋقانىنا قىزۋ دايىندىق جۇمىستارىن جۇرگىزىپ جاتىر. وڭىردە اۋىلشارۋاشىلىق تەحنيكاسىنىڭ 85 پايىزى دايىن. وبلىسقا جەڭىلدىكتى جانارمايدىڭ العاشقى لەگى دە كەلە باستادى. بيىلعى القاپ جۇمىستارىنا ءار ءليترى 170 تەڭگەدەن 71 مىڭ توننا ديزەل وتىنى بولىنگەن.
بيىل قوستاناي وبلىسى 5,2 ملن گەكتار القاپقا ءدان ءسىڭىرۋدى كوزدەپ وتىر. ەگىس القابىنىڭ باسىم بولىگىن جىلداعىداي ءداندى, بۇرشاقتى داقىل الادى. ال 652 مىڭ گەكتارعا مايلى داقىل ەگۋ جوسپارلانعان. اۋىل شارۋاشىلىعى ماماندارىنىڭ ايتۋىنشا, بيىلعى كوكتەمدە مايلى داقىل كولەمى 12 مىڭ گەكتارعا ۇلعايادى. القاپتى ءارتاراپتاندىرۋ جۇمىستارىن ءتيىمدى جالعاستىرۋ ءۇشىن ديقانداردى ىنتالاندىرۋدىڭ جاڭا تەتىكتەرى دە قاراستىرىلعان. بيىل وتاندىق وڭدەۋ زاۋىتتارىنا تاپسىرىلاتىن مايلى داقىل تۇقىمى سۋبسيديالانادى. بۇل ماقساتقا وبلىس بويىنشا 250 ملن تەڭگە قاراستىرىلىپ قويعان.
– ەگىستىكتەردەگى ءداندى داقىلداردىڭ ۇلەسى ءالى دە باسىم. القاپتاردىڭ 75%-ىن ءداندى داقىل الىپ جاتىر, مايلى داقىلدار مەن مال ازىعىنىڭ ۇلەسى – 12%. وسىعان بايلانىستى اۋىل شارۋاشىلىعىن ودان ءارى ءارتاراپتاندىرۋ ماسەلەسى وزەكتى بولىپ قالا بەرەدى. مايلى داقىلداردى, باسقا دا جوعارى ءونىمدى داقىلدار كولەمىن ۇلعايتۋعا مۇمكىندىك مول. سوعان قاراماستان, كوپتەگەن شارۋاشىلىقتار ءالى كۇنگە دەيىن تەك بيداي سەبۋمەن عانا اينالىسىپ كەلەدى. اۋدان اكىمدىكتەرى جەر رەسۋرستارىن ۇتىمدى پايدالانۋ, وڭدەلەتىن داقىل تۇرلەرىنىڭ ءتىزىمىن كەڭەيتۋ, ەگىن شارۋاشىلىعىنا مينەرالدى تىڭايتقىشتاردى ەنگىزۋدى ەسەلەۋ, سۋارمالى ەگىنشىلىكتى دامىتۋ بويىنشا جۇمىستار جۇرگىزۋى قاجەت, – دەدى وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ.
كوكتەمگى ەگىس جۇمىستارىنا 23 مىڭعا جۋىق تراكتور, 1 مىڭعا جۋىق ءدان ەگۋ كەشەنى, 22 مىڭ تۇقىم سەپكىش تەحنيكا قاتىسادى. ولاردىڭ 85 پايىزى تاناپقا شىعۋعا دايىن تۇر. الايدا ديقاندار وڭىرگە جەتكىزىلگەن 71 مىڭ توننا جەڭىلدىكتى ديزەل وتىنىن الۋعا ءالى دە اسىعا قويار ەمەس. وسىعان الاڭداۋشىلىق تانىتقان وبلىس اكىمى وڭىرگە جەتكىزىلەتىن جانارماي مولشەرى ءساۋىر, مامىر ايلارىندا ەسەلەنەتىنىن, سوندىقتان شارۋاشىلىقتار قازىردەن باستاپ قيمىلداماسا, كەيىن قاربالاس تۋىپ, ديزەل وتىنىن ۇلەستىرۋ قيىنعا سوعاتىنىن ەسكەرتتى.
– ءبىز وبلىسقا كوپ جىلدان بەرى جانارماي جەتكىزۋمەن اينالىسىپ كەلە جاتقان سەنىمدى وپەراتورلاردى ساقتاپ قالۋعا تىرىسامىز. قازىر بىزگە جانارماي جەتكىزىپ بەرگىسى كەلەتىن فيرمالار كوپ. ولاردان كۇن سايىن وتىنىمدەر كەلىپ تۇسۋدە. ەڭ باستىسى, بىزگە جانارمايدى ماقساتتى پايدالانۋ ماسەلەسى ماڭىزدى. ءبىزدىڭ قازىرگى وپەراتورلاردىڭ وبلىستىڭ بارلىق اۋدانىندا مۇناي ورتالىقتارى بار. سوندىقتان, جەڭىلدەتىلگەن ديزەل وتىنىن الۋ ديقاندارعا قيىندىق تۋعىزبايدى, – دەدى ارحيمەد مۇحامبەتوۆ.
مەملەكەتتىك سۋبسيديا ماسەلەسىنە كەلسەك, جىلدىڭ باسىندا وڭىرگە 31 ملرد تەڭگە دەمەۋقارجى ءبولىندى. سونىمەن قاتار, «اگرارلىق نەسيە كورپوراتسياسى» اق ارقىلى ديقاندارعا 8,9 ملرد نەسيە قاراجاتى بەرىلدى. ال «ازىق-ت ۇلىك كەلىسىم شارت كورپوراتسياسى» 8,3 ملرد تەڭگەگە اۋىلشارۋاشىلىق ونىمدەرىن فورۆاردتىق ساتىپ الۋدى جۇزەگە اسىرا باستادى.
قوستاناي وبلىسى