قوستاناي وبلىسىندا وزەندەر مەن سۋ قويمالارىنداعى مۇز جارۋ جۇمىستارى جالعاسۋدا. سەڭ قوزعالعانشا جۇرەتىن مۇنداي شارالار سۋ تاسقىنىنان تونەتىن قاۋىپتىڭ الدىن الادى, دەپ حابارلايدى Egemen.kz.
وبلىستىق تجد قوعاممەن بايلانىس توبىنىڭ مالىمەتىنشە, مەرەكە كۇندەرى «NIKSIT» جشس ماماندارى ناۋىرزىم اۋدانىنداعى ءدامدى وزەنى مەن شولاقساي اۋىلىنىڭ ماڭىنداعى بوگەتتە جارىلىس جۇرگىزگەن. سونداي-اق جارۋشىلار جاساعى قاراسۋ اۋدانى قارامىرزا اۋىلىنىڭ ماڭىنداعى ءتىنتۋىر وزەنى مەن قاراسۋ وزەنىندەگى مۇز كەپتەلىسىن جويعان.
مۇز جارۋ جۇمىستارى قاراسۋ اۋدانىنا قاراستى نوۆوسەلوۆ اۋىلىنان 3 شاقىرىم جەردەگى قۇندىزدى وزەنىندە, قاراسۋ اۋىلىنىڭ ماڭىندا, ناۋىرزىم اۋدانىنداعى بۋرەۆەستنيك اۋىلىنا جاقىن جاتقان بوگەتتەردە, اۋليەكول اۋدانى كوكتال اۋىلىنىڭ ماڭىنداعى تەرەكتى وزەنىنىڭ ساعاسىندا ءجۇرىپ جاتىر.
«مۇزدىڭ ورتاشا قالىڭدىعى 1 مەتردەن اسادى. مۇز جارۋ جۇمىستارىنا وبلىستىق تجد, پوليتسيا دەپارتامەنتى مەن جەرگىلىكتى اتقارۋ ورگاندارىنىڭ وكىلدەرى جانە «NIKSIT» سەرىكتەستىگىنىڭ ماماندارى قاتىسۋدا. جارىلىس كەزىندە بارلىق قاۋىپسىزدىك شارالارى قاراستىرىلدى», دەپ مالىمدەدى وبلىستىق تجد قوعاممەن بايلانىس توبى.