ناۋرىز مەرەكەسى قارساڭىندا قوستانايداعى ءى.وماروۆ اتىنداعى قازاق دراما تەاترى «ماقتا قىز» ەرتەگىسىن ساحنالادى. ۇلى اعارتۋشى ىبىراي التىنساريننىڭ بالالارعا ارنالعان ايگىلى شىعارماسىن قازىرگى زامانعا ساي تۇرلەندىرە وتىرىپ, ساحناعا يكەمدەپ قايتا جازىپ شىققان قالامگەر – اقىن, دراماتۋرگ ابىلاي ماۋدانوۆ.
- بۇعان دەيىن ۇلى اعارتۋشىنىڭ اتالمىش ەرتەگىسىنىڭ جەلىسىمەن وبلىستىق قۋىرشاق تەاترى ءۇشىن شاعىن قويىلىم ستسەناريىن جازعان ەدىم. بيىل سونىڭ مازمۇنىن كەڭەيتىپ قايتا جازىپ شىقتىم. باستىسى, قازىرگى بالالاردىڭ تانىم-تۇسىنىگىنە سياتىنداي, قاراپايىم ءارى قىزىقتى وقيعالارعا نەگىزدەي وتىرىپ جەڭىل جازۋعا تىرىستىم. قازاق دراما تەاترىنىڭ رەجيسسەرى دوس قۇباش مۋزىكالىق جانە بي كورىنىستەرىمەن ارلەپ, ادەمى قويىپ شىقتى. قويىلىمدا اۋىلعا – اتا-اجەسىنە قالادان قىدىرىپ كەلگەن بالا ۇيالى تەلەفونىنان ايىرىلعان سوڭ, ءشوپتىڭ قالاي جينالاتىنىن, سيىردى قالاي ساۋاتىنىن, اعاشتىڭ قالاي وسەتىنىن, جۇمىرتقانىڭ قايدان شىعاتىنىن ءوز كوزىمەن كورىپ, اۋىلدىڭ شىنايى تۇرمىس-تىرشىلىگىمەن تانىسادى. جالپى, مەرەكەلىك قويىلىم كىشكەنتاي كورەرمەندەردىڭ كوڭىلىنەن شىقتى, سوعان قۋاندىم, - دەدى ابىلاي ماۋدانوۆ.
بالالارعا ارنالعان مەرەكەلىك قويىلىمنىڭ ءبىر ەرەكشەلىگى – ساحناداعى كەيىپكەرلەر مەن زالداعى بالعىن كورەرمەندەر قوسىلىپ ءان سالىپ, بي بيلەپ, ەرتەگى الەمىنە بىرگە ساياحات جاسايدى. تەاتر تارتۋ ەتكەن مەرەكەگە بالالارىن ەرتىپ كەلگەن اتا-انالار دا ءدان ريزا. «ناۋرىز مەيرامى بولعان سوڭ, نەمەرەمدى جۋانتايىن دەپ, سوناۋ دەنيسوۆ اۋدانىنان كەلىپ تۇرمىز. بۇگىنگى قويىلىمنان تاماشا اسەر الدىق. نەمەرەمە دە ۇنادى. ساحناداعى ەرتەگى كەيىپكەرلەرىمەن بىرگە كىشكەنتاي كورەرمەندەردىڭ بارلىعى بي بيلەپ, ۋاقىتتىڭ قالاي وتكەنىن بىلمەي قالدىق. وسىنى كورىپ, قۋانىپ وتىرمىن. ءوزىم دە «قارا جورعانى» بيلەپ, كوڭىلىم كوتەرىلىپ, ءبىر سەرگىپ قالدىم. وسى ءساتتى پايدالانىپ, بارشا قوستانايلىقتاردى ۇلىستىڭ ۇلى كۇنىمەن قۇتتىقتايمىن! اسپانىمىز اشىق, وتباسىمىز امان بولسىن! بالالارىمىزعا بۇگىنگىدەي ءتالىم-تاعىلىمعا تولى, كوڭىلدى ءارى اسەرلى قويىلىمدى تارتۋ ەتكەن قازاق دراما تەاترىنا العىسىمىز شەكسىز!» دەدى كورەرمەن اجەيلەردىڭ ءبىرى.