اقتاۋدا كەمەلەردى ورنالاستىرۋ پۋنكتتەرىنىڭ ديۆەرسياعا قارسى قورعانىسىن ۇيىمداستىرۋدان اسكەري-تەڭىز كۇشتەرى مەن تەڭىز جاياۋ اسكەرلەرى بريگاداسىنىڭ بىرلەسكەن وقۋ-جاتتىعۋى ءوتتى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
دابىل بەرىلە سالا ارنايى ماقساتتاعى جاۋىنگەرلىك بارلاۋ باتالونى كوتەرىلدى. ارنايى ماقساتتاعى بارلاۋ روتاسىنا اسكەري-تەڭىز كۇشتەرىنىڭ وبەكتىلەرىن كۇزەتۋ جانە قورعاۋ تۋرالى جاۋىنگەرلىك وقۋ-جاتتىعۋ مىندەتى قويىلدى.
بولىمشەلەر ۇيىمداسقان تۇردە كەمەلەر ورنالاسقان ايماققا مارش جاساپ, سودان كەيىن قارسىلاستىڭ سۋ استى ديۆەرسيالىق كۇشتەرىنىڭ ەنۋىنە جول بەرمەۋ ءۇشىن اسكەري-تەڭىز كۇشتەرىنىڭ پيرستەرى مەن كەمەلەرىن كۇزەتۋدى جانە قورعاۋدى ۇيىمداستىردى. بولىمشەلەردىڭ جەكە قۇرامى قولباسشىلىقتان ءورت ءسوندىرۋ جانە مەديتسينالىق كوماندالاردى قولدانۋ بويىنشا ءتۇرلى نۇسقاۋ الدى. ال اسكەري تەڭىزشىلەر تەڭىزگە شىقتى.
اتالعان وقۋ-جاتتىعۋعا شتاتتىق قارۋ-جاراقپەن بارلىعى 150-گە جۋىق اسكەري قىزمەتشى, اسكەري جانە ارنايى تەحنيكا جۇمىلدىرىلدى.
بۇل وقۋ-جاتتىعۋ جەكە قۇرامعا سۋ استىنداعى ديۆەرسياعا قارسى ءىس-قيمىلدار مەن كۇزەت ءىس-شارالارىن ۇيىمداستىرۋعا قاجەتتى پراكتيكالىق ماشىقتاردى ۇيرەنۋگە مۇمكىندىك بەردى.
وسىنداي بىرلەسكەن وقۋ-جاتتىعۋ جاۋىنگەرلىك دايارلىق جوسپارىنا سايكەس ۇدايى تۇردە جاۋىنگەرلىك جاعدايدى كۇشەيتە وتىرىپ وتكىزىلەدى.