قازاقستاندا وڭىرلەردىڭ ينۆەستيتسيالىق رەيتينگتەرى ەنگىزىلەدى

ۇلتتىق ەكونوميكا ءمينيسترى اسەت ەرعاليەۆ ينۆەستيتسيالار تارتۋ جونىندەگى قولدانىستاعى شارالاردىڭ تيىمدىلىگىن كەشەندى باعالاۋ ماقساتىندا وڭىرلەردىڭ ينۆەستيتسيالىق رەيتينگىن ەنگىزۋ جوسپارلانىپ وتىرعانىن ايتتى. ول ينۆەستورلارمەن جۇمىس ىستەۋ بويىنشا نەعۇرلىم ءتيىمدى پراكتيكانى ايقىنداۋعا مۇمكىندىك بەرەدى, سونداي-اق جەرگىلىكتى بيلىك ورگاندارىنىڭ جۇمىسىن ىنتالاندىرادى.

رەيتينگ ساۋالناما ادىسىمەن الىنعان مالىمەتتەر, سونداي-اق ستاتيستيكالىق دەرەكتەر مەن ساراپتامالىق باعالاۋ نەگىزىندە 50 ينديكاتوردان تۇرادى. وڭىرلەردىڭ ينۆەستيتسيالىق رەيتينگى مەن ينۆەستيتسيالار جونىندەگى ۇلتتىق باياندامانى ءار جىلدىڭ 1 توقسانىندا شىعارۋ جوسپارلانىپ وتىر. ۇلتتىق باياندامانىڭ قۇرىلىمى ەكى اپتا ىشىندە دۇنيەجۇزىلىك بانكتىڭ, ەۋروپا قايتا قۇرۋ جانە دامۋ بانكىنىڭ, ازيا دامۋ بانكىنىڭ ساراپشىلارىمەن كەلىسىلەتىن بولادى.

الىنعان ۇسىنىمداردى ەسكەرە وتىرىپ, ەكونوميكالىق زەرتتەۋلەر ينستيتۋتى «Kazakh Invest» ۇك» اق-مەن بىرلەسىپ, رەيتينگتىڭ ءبىرىنشى شىعارىلىمى مەن 2020 جىلعا ارنالعان باياندامانى دايىندايدى. پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى, ستراتەگيالىق جوسپارلاۋ جانە رەفورمالار جونىندەگى اگەنتتىكتىڭ توراعاسى – «استانا» حالىقارالىق قارجى ورتالىعىنىڭ (احقو) باسقارۋشىسى قايرات كەلىمبەتوۆ پەن «Kazakh Invest» ۇك» اق باسقارما توراعاسى مەيىرجان يۋسۋپوۆ «Business Connect» احقو بولىمشەسى مەن «Kazakh Invest» ۇك» اق ساراپشىلارىنان قۇرالعان «Task Force» ارنايى كومانداسىنىڭ جۇمىس ءتارتىبى تۋرالى باياندادى.

ساۋدا جانە ينتەگراتسيا مينيسترلىگىنىڭ ۇسىنىسى بويىنشا اتالعان كومانداعا «Qaztrade» ساۋدا ساياساتىن دامىتۋ ورتالىعى» اق وكىلدەرى دە كىرەدى. «Task Force» ۇكىمەت اتىنان شەتەلدىك ينۆەستورلارمەن بىرىڭعاي كەلىسسوز جۇرگىزۋشى رەتىندە ارەكەت ەتەدى, ستراتەگيالىق ينۆەستيتسيالىق كەلىسىمدەردىڭ جوبالارىن قالىپتاستىرىپ, ينۆەستيتسيالىق جوبالار جونىندەگى جۇمىسقا ورتالىق مەملەكەتتىك جانە جەرگىلىكتى اتقارۋشى ورگانداردى, كۆازيمەملەكەتتىك سۋبەكتىلەردى تارتادى, ينۆەستيتسيالىق شتابتىڭ شەشىمىنەن كەيىن وپەراتسيالىق قىزمەت باستالعانعا دەيىن ينۆەستورلاردى سۇيەمەلدەيدى.

يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ 2021-2025 جىلدارى ونەركاسىپتە, قۇرىلىس سالاسىندا, كولىك سەكتورىندا, جەر قويناۋىن پايدالانۋدا جانە قورعانىس-ونەركاسىپ كەشەنىندە جالپى سوماسى 17,6 ترلن تەڭگە بولاتىن جەكە ينۆەستيتسيالارعا 819 جوبانى ىسكە اسىرۋ جوسپارلانعانىن اتاپ ءوتتى. وسى جىلى نەگىزگى كاپيتالعا ينۆەستيتسيالاردىڭ نىسانالى كولەمى 6 ترلن تەڭگە مولشەرىندە بەلگىلەنگەن. «قازمۇنايگاز» ۇك» اق باسقارما توراعاسى اليك ايدارباەۆ كومپانيانىڭ ينۆەستيتسيالىق پورتفەلىندە جالپى سوماسى 58,1 ترلن تەڭگە بولاتىن 57 جوبا بار ەكەنىن اتاپ ءوتتى.

كاسپي قايراڭىندا اباي, يساتاي, جەڭىس, ءال-فارابي, قالامقاس-تەڭىز, حازار جانە حۆالىنسكوە سەكىلدى جەر قويناۋىن پايدالانۋدىڭ ينۆەستيتسيالىق جوبالارىن ىسكە اسىرۋ ماسەلەلەرى پىسىقتالۋدا. بيىل قازاقستان – قىتاي مۇناي قۇبىرىن سالۋ, كاسپي تەڭىزىنىڭ ازەربايجان سەكتورىنداعى ابشەرون جانە بابەك كەن ورىندارىندا وزدىگىنەن كوتەرىلەتىن قالقىمالى بۇرعىلاۋ قوندىرعىسىن سالۋ جانە تۇرلەندىرۋ, الماتى قالاسىن گازداندىرۋ, قارا تەڭىز وڭىرىندەگى بولشەك ساۋدا جەلىسىن دامىتۋ, KPI قاجەتتىلىكتەرى ءۇشىن سىعىلعان اۋا ءوندىرۋ قوندىرعىسىن سالۋ اياسىندا رەۆەرس ينۆەستيتسيالىق جوبالارىن اياقتاۋ جوسپارلانىپ وتىر.

نۇر-سۇلتان قالاسىنىڭ اكىمى التاي كولگىنوۆ الداعى 5 جىلدا ونەركاسىپ, ساۋدا جانە لوگيستيكا, قۇرىلىس يندۋسترياسى, ەلەكتر ەنەرگەتيكاسى, ءبىلىم بەرۋ, مەديتسينا جانە سپورت سالالارىندا 18 مىڭ جاڭا جۇمىس ورنىن قۇرا وتىرىپ, جالپى سوماسى 2 ترلن تەڭگە ينۆەستيتسياعا 125 جوبادان تۇراتىن پۋل قۇرىلعانىن اتاپ ءوتتى.

وسى جىلدىڭ باسىنان بەرى ينۆەستيتسيالاردىڭ 16,4%-عا ءوسۋى بايقالادى. بيىل ەلوردانىڭ نەگىزگى كاپيتالىنا بارلىعى 1,26 ترلن تەڭگە ينۆەستيتسيا تارتۋ جوسپارلانۋدا. الماتى وبلىسى اكىمىنىڭ ورىنباسارى سەرىك تۇرداليەۆ الداعى بەس جىلدا وڭىردە ماشينا جاساۋ, قۇرىلىس ماتەريالدارىن ءوندىرۋ, اۋىل شارۋاشىلىعى, بالىق شارۋاشىلىعى, ازىق-ت ۇلىك ونىمدەرىن ءوندىرۋ, تمك, لوگيستيكا, جاڭارتىلاتىن ەنەرگەتيكا جانە ت. ب. سالالاردا 1,7 ترلن تەڭگەدەن استام سوماعا 150 جوبانى ىسكە اسىرۋ كوزدەلگەنىن ايتتى. بيىل وڭىرگە 453 ملرد تەڭگە ينۆەستيتسيا تارتۋ جوسپاردا بار.

«ىسكەرلىك بەلسەندىلىكتى قالپىنا كەلتىرۋ جانە ەكونوميكانىڭ ودان ءارى ساپالى ءوسۋى ءۇشىن ىشكى جانە سىرتقى ينۆەستيتسيالاردى تارتۋ بويىنشا جۇيەلى جۇمىس جۇرگىزۋ قاجەت», دەدى ا. مامين.