قوستاناي قالاسىنىڭ ىرگەسىندەگى زارەچنىي اۋىلىنداعى ءتورت قاباتتى جالدامالى ۇيدە تۇرىپ جاتقان 19 وتباسىن پروكۋرورلىق تەكسەرىس زاڭسىز قونىستانۋشى دەپ تانىپ, تۇرعىندار «نۇرلى جەر» باعدارلاماسى بويىنشا قونىستانعان باسپانالارىنان ايىرىلىپ قالا جازدادى. وسىلايشا, 2 جارىم جىل بۇرىن كونستيتۋتسيا كۇنى مەرەكەسى قارساڭىندا وبلىس اكىمى ارحيمەد مۇحامبەتوۆتىڭ ءوز قولىنان پاتەر كىلتتەرىن الىپ, باسپانا باقىتىنا بولەنگەن بيۋدجەتتىك مەكەمە قىزمەتشىلەرى ەكى كۇن بويى دۇرلىككەن.
2018 جىلى سەۆەرنىي كوشەسىندەگى №5/10 ۇيگە قونىستانعان قاتارداعى مۇعالىم, تاربيەشى, دارىگەر, مەملەكەتتىك قىزمەت ماماندارىنا تاياۋدا اۋداندىق تۇرمىستىق-كوممۋنالدىق شارۋاشىلىق ءبولىمىنىڭ وكىلى كەلىپ, ء«بىر ايدىڭ ىشىندە پاتەرلەرىڭىزدى بوساتىڭىزدار» دەگەن ەسكەرتۋ حات ۇلەستىرىپ كەتكەن. پاتەر جالداۋ كەلىسىمشارتىن بۇزۋ تۋرالى ەسكەرتۋدە: «قوستاناي اۋدانى پروكۋراتۋراسىنىڭ 2021 جىلدىڭ 19 قاڭتارىنداعى №2-0914-21-00070 ۇسىنىسىنا سايكەس, قوستاناي اۋدانىنىڭ تۇرمىستىق-كوممۋنالدىق شارۋاشىلىق, جولاۋشىلار ترانسپورتى جانە اۆتوموبيل جولدارى ءبولىمى» مەملەكەتتىك مەكەمەسى سىزدەرگە 30 كۇنتىزبەلىك كۇن ىشىندە 2018 جىلدىڭ 5 قىركۇيەگىندەگى №36 جالعا الۋ شارتىنىڭ بۇزىلاتىنىن ەسكەرتەدى. سىزدەردەن 30 كۇنتىزبەلىك كۇننىڭ ىشىندە وتكىزۋ-قابىلداۋ اكتىسى بويىنشا پاتەرلەرىڭىزدى وتكىزىپ بەرۋدى سۇرايمىز» دەپ جازىلىپ, اۋداندىق ءبولىمنىڭ باسشىسى ك.قۇرمانعاليەۆتىڭ قولى قويىلىپ, ءمورى باسىلعان.
– بۇل ءۇيدى ءبىز 2018 جىلى «نۇرلى جەر» باعدارلاماسىمەن الدىق. پاتەر كىلتتەرىن وبلىس اكىمى ءوز قولىمەن تابىس ەتكەن. ءوزىم بيۋدجەتتىك مەكەمەدە جۇمىس ىستەيمىن. ماماندىعىم مۇعالىم. بۇل ءۇيدى مەن بيۋدجەتتىك مەكەمە قىزمەتكەرى رەتىندە العان ەدىم. 14 ساۋىردە تكش ءبولىمىنىڭ قىزمەتكەرلەرى كەلىپ, 30 كۇننىڭ ىشىندە پاتەردى بوساتىڭدار دەپ كەتتى. ءبىز 2018 جىلعا دەيىن باسپانا كەزەگىندە تۇردىق, ەندى بۇل پاتەردەن ايىرىلساق, قايدا بارامىز؟ بۇل – جالدامالى ءۇي. 3 جىلعا جۋىق ۋاقىت تۇرىپ جاتىرمىز. ەندى كەلىپ تكش ماماندارى: «بۇل پاتەرلەر سىزدەرگە قاتەلەسىپ بەرىلگەن», دەپ وتىر. ءبىزدىڭ كىنامىز نە؟ ءبارىمىز باسپانا كەزەگىندە تۇرعان جاندارمىز. قازىر بۇل ۇيدەن شىعارىپ جىبەرسە, بۇرىنعى پاتەر الۋ ءۇشىن تىركەلگەن كەزەگىمىز دە ءوتىپ كەتتى. مۇندا تۇراتىنداردىڭ كوبىنىڭ شيەتتەي بالا-شاعاسى بار, قايدا بارارىمىزدى بىلمەي ءبارىمىزدىڭ باسىمىز قاتىپ وتىر, – دەدى №1 پاتەردىڭ تۇرعىنى گۇلميرا عابدۋللينا.
بالاباقشادا تاربيەشى بولىپ جۇمىس ىستەيتىن ورىنكۇل قاشقىنباەۆا وسى ءۇيدىڭ ءۇشىنشى قاباتىنداعى №28 پاتەردە تۇرادى.
– ءبارىمىز ءبىر ايلىققا قاراپ وتىرعان ادامبىز عوي. تۇرعىنداردىڭ بارلىعىنىڭ دا بانكتەن العان نەسيەسى بار. بۇل ۇيدەن شىعارىپ جىبەرسە, پاتەر جالدايتىن جاعدايىمىز جوق. ءتۇس كورىپ جاتقان شىعارمىز دەپ ءالى سەنبەي ءجۇرمىز. اكىمدىك جايىمىزدى ءتۇسىنىپ, پاتەردى جالعا الۋ كەلىسىمشارتىنا وزگەرىس ەنگىزىپ, اي سايىن يپوتەكا تولەيتىندەي جاعداي تۋعىزسا جاقسى بولار ەدى, – دەدى و.قاشقىنباەۆا.
№5/10 ءۇي اۋەل باستا جەتىمدەر مەن مۇمكىندىگى شەكتەۋلىلەرگە, كوپ بالالى انالارعا ارنالىپ تۇرعىزىلىپتى. ال جەرگىلىكتى اكىمدىك پاتەر بوساتۋدى تالاپ ەتكەن 19 وتباسى – بۇل ساناتقا جاتپايتىن ازاماتتىق جانە مەملەكەتتىك قىزمەتشىلەر. پروكۋرورلىق تەكسەرىس وسى جەردەن قاتە تاپقان سىڭايلى.
16 ناۋرىز كۇنى وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ 19 وتباسىمەن كەزدەسىپ, جىلۋ ماۋسىمى اياقتالعانشا ەشكىم جىلى ورنىنان شىعارىلمايتىنىن, بۇل ماسەلە ءالى دە قاراستىرىلاتىنىن ايتىپ ۋادە بەرگەن. ارتىنشا, قوستاناي اۋدانى اكىمىنىڭ ءباسپاسوز قىزمەتى «16 ناۋرىز كۇنى زارەچنىي اۋىلىنىڭ سەۆەرنىي كوشەسىندەگى №5/10 ءۇيدىڭ تۇرعىندارىمەن وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ پەن اۋدان اكىمى جانسۇلتان تاۋكەنوۆ كەزدەسۋ وتكىزگەن. «كەزدەسۋ بارىسىندا تۇرعىندارعا بارلىق جاعداي ءتۇسىندىرىلدى. بۇل ماسەلە جىلۋ ماۋسىمى اياقتالعان سوڭ, ءار تۇرعىننىڭ جاعدايىنا قاراي جەكە-جەكە ازاماتتىق قۇقىق شەڭبەرىندە قاراستىرىلادى» دەگەن مالىمەت تاراتتى.
17 ناۋرىز كۇنى تاڭەرتەڭ اۋدان اكىمى جانسۇلتان تاۋكەنوۆ №5/10 ۇيدەگى 19 وتباسىمەن قايتا كەزدەسىپ, تۇرعىنداردىڭ ءبىرجولا ءوز پاتەرلەرىندە قالاتىنىن ايتقان. بۇل قۋانىشتى حاباردى بىزگە وسى ۇيدەگى №6 پاتەردىڭ تۇرعىنى تيموفەي كوبەتس جەتكىزدى.
– ماسەلە شەشىلدى. بۇگىن اۋدان اكىمى جانسۇلتان تاۋكەنوۆتىڭ ءوزى كەلىپ ءبارىمىزدى قۋانتىپ كەتتى. اكىم پروكۋراتۋراعا ارنايى حات جازىپ, ناتيجەسىندە قۇقىق قورعاۋ ورگاندارىنىڭ قاتىسۋىمەن جينالىس ءوتىپتى. جينالىس بارىسىندا تۇرعىندار №5/10 ۇيگە زاڭدى تۇردە قونىستانعان. مۇندا تۇرىپ جاتقان مۇعالىمدەر, تاربيەشى, دارىگەر ماماندار مەن مەملەكەتتىك قىزمەتشىلەر ۇزاق ۋاقىت باسپانا كەزەگىندە تۇردى. ولار ءوز پاتەرلەرىندە قالۋعا تولىق قۇقىلى. سوندىقتان اتالعان ۇيدەگى 19 وتباسى ەشقاشان پاتەرلەرىنەن شىعارىلمايدى دەگەن شەشىم قابىلدانىپتى. ءبىز اۋدان اكىمىنەن وتىرىس حاتتاماسى مەن ءوزى جازعان ارنايى حاتتىڭ كوشىرمەسىن سۇراپ ەدىك, جانسۇلتان قوڭىرتاي ۇلى كەشكە دەيىن اكەلىپ, قولىمىزعا تاپسىراتىنىن ايتتى. ەندى ءبارىمىز ءوز پاتەرىمىزدە قالاتىن بولدىق. ماسەلەنى ۋشىقتىرماي, دەر ۋاقىتىندا شەشىپ بەرگەن اۋدان باسشىلىعىنا العىسىمىز شەكسىز, – دەدى ت.كوبەتس.
قوستاناي وبلىسى,
زارەچنىي اۋىلى