تۇركىستان وبلىسىندا دەمالىس كۇندەرى تولاسسىز جاۋعان جاڭبىردىڭ سوڭى قالىڭ قارعا ۇلاسىپ, وبلىستىق ماڭىزى بار جولدار جابىلعان بولاتىن.
سوزاق اۋدانى قۇمكەنت ەلدى مەكەنىنىڭ جانىندا, وبلىستىق ماڭىزى بار «سوزاق – تاراز» تاسجولىنىڭ 45 شاقىرىمىندا, «YUTONG» جولاۋشىلار تاسىمالدايتىن اۆتوبۋس كوكتايعاق سالدارىنان جولدىڭ شەتىنە شىعىپ كەتكەن. بۇل جايلى حابارلاما 101 كەزەكشىلىك پۋلتىنە كەلىپ تۇسكەن. وقيعا ورنىنا جەتكەن تۇركىستان وبلىسى تجد 15 قىزمەتكەرى مەن تەحنيكاسى اۆتوبۋستى جولدىڭ تازارتىلعان بولىگىنە الىپ شىقتى. اۆتوبۋستاعى 29 ادام, ونىڭ ىشىندە 1 بالا قۇتقارىلدى. دەپارتامەنت قىزمەتكەرلەرى قۇتقارىلعان ادامداردى شولاققورعان اۋىلىنا جەتكىزۋ بارىسىندا جولدا قۇمكەنت اۋىلىندا قار قۇرساۋىندا قالىپ قويعان 4 ادامدى, ونىڭ ىشىندە جۇكتى ايەلدى جانە بالانى قۇتقاردى.
وبلىستىق تجد مالىمەتىنشە, جەكسەنبى كۇنى قار قۇرساۋىنان قۇتقارىلعان 33 ادام شولاققورعان اۋىلىنا جەتكىزىلگەن. زارداپ شەككەندەر مەن جاراقات العاندار جوق.