جەكسەنبىدە فۋتبولدان قازاقستان چەمپيوناتىنىڭ ءتورت ويىنى وتۋگە ءتيىس ەدى. الايدا اۋا-رايىنىڭ قولايسىزدىعىنا بايلانىستى شىمكەنتتىڭ «ورداباسى» جانە پەتروپاۆلوۆسكىنىڭ «قىزىلجار» كلۋبتارى اراسىنداعى ماتچ كەيىنگى شەگەرىلدى, دەپ حابارلايدى Egemen.kz.
پرەمەر-ليگاعا قايتا ورالعان «اقتوبە» اقتاۋدا «كاسپيگە» قارسى وينادى. ءبىرىنشى تايمدا ەسەپ اشىلماعانىمەن, ۇزىلىستەن سوڭ الاڭعا ەندى عانا شىققان فرانتسيالىق لەگيونەر ۋادجدي سالي 52-مينۋتتا ايىپ دوبىن كەرەمەت ورىنداپ, جەرگىلىكتى جانكۇيەرلەردى قۋانتتى. الايدا كوپ ۇزاماي ماكسيم فەدين 11 مەترلىك نۇكتەدەن نىسانانى ءدال كوزدەپ, تارازى باسىن تەڭەستىردى. ەسەپ – 2:2.
قوستانايدا «توبىلى» ورالدىڭ «اقجايىعىن» قابىلداپ, قوناقتار قاقپاسىنا جاۋاپسىز ەكى دوپ سالدى – 2:0. بۇل گولداردىڭ اۆتورلارى – ازات نۇرعاليەۆ (30-مينۋت) پەن اسحات تاعىبەرگەن (75-مينۋت).
ال قىزىلوردا «قايسار» مەن «تاراز» اراسىنداعى ماتچتىڭ ءبىرىنشى كەزەڭىندە بەس گول سوعىلدى. ەلدوس احمەتوۆ (5-مينۋت) پەن ماقسات بايجانوۆ (22-مينۋت) قاتارىنان ەكى مارتە نىسانانى ءدال كوزدەگەننەن كەيىن كورەرمەندەر قوناقتار ەندى ەس جيا المايتىن شىعار دەپ ويلادى. بىراق ولار تىم ەرتە قۋانعان ەكەن. ۇزىلىسكە شىققانعا دەيىن ابزال تاۋباي (25-مينۋت), ابىلايحان جۇمابەك (36-مينۋت) جانە باۋىرجان بايتانا (45-مينۋت) مەرگەندىك تانىتىپ, «تارازدى» العا شىعاردى – 2:3. كەزدەسۋدىڭ سوڭىنا دەيىن بۇل ەسەپ وزگەرگەن جوق.