ءا.قاستەەۆ اتىنداعى مەملەكەتتىك ونەر مۋزەيىنىڭ جيناقتاماسىنان (گراۆيۋرا جانە وفورت) الىنعان تۋىندىلار كورەرمەندى الەمدىك مادەنيەتتىڭ مايەگىمەن تانىستىرادى. وسى ورايدا الماتىدا «16-17 عاسىرلارداعى ەۋروپا گرافيكاسى» دەپ اتالعان كورمە اشىلدى, دەپ حابارلايدى Egemen.kz
ەكسپوزيتسياعا گەرمانيا, فرانتسيا جانە گوللانديا سۋرەتشىلەرى البرەحت ديۋرەر, جاك كاللو, رەمبراندت ۆان رەين, انتوني ۆاتەرلو, يان ليۆەنس سىندى بەلگىلى قىلقالام شەبەرلەرىنىڭ 100-دەن استام تۋىندىسى قويىلعان. جاھاندىق الەمدى قۇرۋ جولىنداعى بەتبۇرىس كەزەڭى دەپ اتالعان 16-17 عاسىر الەمدىك تاريحتىڭ ماڭىزدى كەزەڭى سانالادى. ءدال سول جىلداردان باستاپ گرافيكانىڭ وفورت دەپ اتالاتىن ءتۇرى باسپا گرافيكاسىنىڭ تانىمدىق, عىلىمي جانە ءدىني مازمۇنداعى سۋرەتتەرىن تاراتاتىن ىڭعايلى ءارى ارزان قۇرال رەتىندە قولدانىلا باستادى.
كورمەگە فرانتسۋز گرافيكا مەكتەبىن تانىستىراتىن XVII عاسىرداعى كورنەكتى شەبەر, ءوزىنىڭ زامانداس سۋرەتشىلەرىنە, ولاردىڭ اراسىندا ايگىلى رەمبراندتقا ەلەۋلى ىقپال جاساعان جاك كاللونىڭ (1592-1635) تۋىندىلارى قويىلدى. كاللونىڭ «سوعىستىڭ كىشى اپاتتارى» (1632) جانە «سوعىستىڭ ۇلكەن اپاتتارى» (1634) توپتامالارى فرانتسۋز اسكەرىنىڭ ونىڭ تۋعان لوتارينگياسىن باسىپ العان قايعىلى كورىنىسىنەن تۋعان. ونىڭ كومپوزيتسيالارىنان زورلىق-زومبىلىق پەن سوعىسقا دەگەن نارازىلىق ءۇنى ەستىلەدى.
ەكسپوزيتسيانىڭ نەگىزگى بولىگىن تۋىندىلارى الەمدىك بەينەلەۋ ونەرىندە ۇزدىك تۇپنۇسقا بولىپ سانالاتىن كورنەكتى گوللاند سۋرەتشىسى رەمبراندت ۆان رەيننىڭ (1606-1669) تۇپنۇسقا تۋىندىلارىنان جاسالعان وفورتتارى الادى. مۋزەيگە ايگىلى ورىس كوللەكتسيونەرى ءارى سۋرەتشىسى, رەمبراندتىڭ شىعارماشىلىعىن اسا ءسۇيۋشى ن. موسولوۆتىڭ (1847-1914) كوللەكتسياسىنان تۇسكەن بۇل گرافيكالىق تۋىندىلار ۇلى شەبەردىڭ جاۋھارلارىنىڭ ەرەكشەلىكتەرىن جەتكىزۋدە ورىنداۋ شەبەرلىگىمەن جانە اسقان دالدىگىمەن دارا تۇر. ەكسپوناتتاردىڭ اراسىنان رەمبراندتىڭ «كيەلى وتباسى» (1645), «تۇنگى باقىلاۋ» (1642), «اداسقان ۇلدىڭ ورالۋى», «دانايا» سىندى بەلگىلى كارتينالارىنىڭ وفورتتارىن كورۋگە بولادى. وسى كورمەگە قويىلعان تۋىندىلاردىڭ ىشىنەن ونىڭ ەرتەرەكتەگى «لەيدەن» كەزەڭىندە ورىندالعان رەمبراندتىڭ «قايىرشى» (1630) كومپوزيتسياسى ەرەكشە قىزىقتىرادى. «ادامنىڭ سىرتقى كەلبەتىن تۇزەتۋگە قاناعاتتانبايتىن, بىراق ونىڭ ىشكى جاعدايىن انىقتاۋعا تىرىساتىن» (ە.لەۆيتين) رەمبراندتتىڭ كولەمى شاعىن وفورتى ونىڭ سۋرەتكەر رەتىندە جوعارى شەبەرلىگىن كورسەتەدى.
كورەرمەن ءۇشىن ۇلى گوللاند سۋرەتشىسىنىڭ شىعارماشىلىعىنا ارنالعان ءار جىلدارداعى سيرەك كىتاپ باسىلىمدارىن تاماشالاۋدىڭ تاپتىرماس مۇمكىندىگى تۋىپ وتىر. ەكسپوزيتسيانىڭ اتالعان بولىمىمەن – ءا.قاستەەۆ اتىنداعى مەملەكەتتىك ونەر مۋزەيىنىڭ كىتاپحانا قورىنداعى بىرەگەي جيناقتاما اياسىندا دا تانىسۋعا بولادى.