2021 جىلدىڭ قاڭتار-اقپانىندا جالپى ىشكى ءونىمنىڭ ءوسۋ قارقىنى مينۋس 2,9 پايىزعا دەيىن جاقساردى. بۇل تۋرالى بۇگىن ۇكىمەت وتىرىسىندا قر ۇلتتىق ەكونوميكا ءمينيسترى اسەت ەرعاليەۆ ايتتى.
«2021 جىلعى قاڭتار-اقپاندا ماكروەكونوميكالىق كورسەتكىشتەر وڭ ۇدەرىستى كورسەتتى. كەن ءوندىرۋ ونەركاسىبىن ەسەپكە الماعاندا, ناقتى سەكتوردا ءوسىم 6,3 پايىزعا دەيىن جەدەلدەدى. نەگىزگى كاپيتالعا ينۆەستيتسيا كەن ءوندىرۋ ونەركاسىبىن ەسەپكە الماعاندا, 13,3 پايىز ءوستى.
جىلدىق ينفلياتسيا 7,4 پايىز دەڭگەيىندە ساقتالدى. كەن ءوندىرۋ ونەركاسىبىنەن باسقا, ناقتى سەكتوردىڭ بارلىق سالالارى تۇراقتى ءوسىم كورسەتتى. ولار: قۇرىلىس, سۋمەن جابدىقتاۋ, وڭدەۋ ونەركاسىبى, ەلەكترمەن جابدىقتاۋ جانە اۋىل شارۋاشىلىعى سالالارى.
سونىمەن قاتار, اقپارات پەن بايلانىس سالاسى 9,4 پايىزعا ارتتى», - دەدى 2021 جىلدىڭ قاڭتار-اقپانىنداعى ەلىمىزدىڭ الەۋمەتتىك-ەكونوميكالىق دامۋ قورىتىندىسى جايىندا بايانداعان مينيستر. ونىڭ اتاپ وتۋىنشە, وسىنىڭ ناتيجەسىندە جالپى ىشكى ءونىمنىڭ ءوسۋ قارقىنى وسى جىلعى قاڭتارداعى مينۋس 4,5 پايىزدان قاڭتار-اقپاندا مينۋس 2,9 پايىزعا دەيىن جاقساردى.
«وڭدەۋ ونەركاسىبى سالالارىندا تۇراقتى ءوسىم ساقتالۋدا. ءوسۋدىڭ جەدەلدەۋى ماشينا جاساۋدا - 21,2, قۇرىلىس ماتەريالدارى وندىرىسىندە - 22,9, حيميالىق ونىمدەر وندىرىسىندە - 14,1, پلاستماسسا ونىمدەرى وندىرىسىندە - 14,2ا, كيىم وندىرىسىندە - 19,9, جيھاز وندىرىسىندە - 15,7, فارماتسەۆتيكادا 9,2 پايىزعا دەيىن بايقالادى. جوعارعى ءوسىم اۆتوموبيل قۇراستىرۋدا 19,6 پايىز دەڭگەيىندە ساقتالدى», دەدى اسەت ەرعاليەۆ.