ۇلتتىق ۇلاننىڭ باس قولباسشىلىعىندا قازاقستان رەسپۋبليكاسى پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ «قازاقستان رەسپۋبليكاسىنىڭ ۇلتتىق ۇلانى تۋرالى» قر زاڭىن جۇزەگە اسىرۋ ماسەلەلەرى جونىندەگى كوشپەلى وتىرىسى ءوتتى, دەپ حابارلايدى Egemen.kz
كوميتەت ءتورايىمى ايگۇل قۇسپاننىڭ جەتەكشىلىگىمەن وتكەن وتىرىسقا كوميتەت مۇشەلەرى, قر ىشكى ىستەر ءمينيسترى ەرلان تۇرعىمباەۆ, قارجى جانە ۇلتتىق ەكونوميكا ۆيتسە-مينيسترلەرى تاتيانا ساۆەلەۆا مەن ايگۇل شايىموۆا, ۇلتتىق ۇلان باس قولباسشىسى رۋسلان جاقسىلىقوۆ جانە قۇقىقتىق ءتارتىپ اسكەرىنىڭ لاۋازىمدىق تۇلعالارى قاتىستى.
وتىرىستى اشقان ايگۇل قۇسپان ءماجىلىستىڭ ءپروفيلدى كوميتەتى ۇلتتىق قاۋىپسىزدىك پەن قورعانىس قابىلەتىن قامتاماسىز ەتۋ ماسەلەلەرى بويىنشا ەلىمىزدىڭ كۇشتىك قۇرىلىمدارىندا وسى تەكتەس باسقوسۋلاردى تۇراقتى وتكىزىپ تۇراتىنىن تىلگە تيەك ەتتى.
– بۇگىن كوميتەت مۇشەلەرى قۇقىقتىق ءتارتىپ اسكەرىنىڭ قىزمەتىمەن تانىسۋ ماقساتىندا ۇلتتىق ۇلانعا ارنايى كەلدى. وسى كوشپەلى وتىرىس اياسىندا دەپۋتاتتار تاراپىنان ءتيىمدى پراكتيكالىق كومەك كورسەتۋ ءۇشىن قۇرىلىمنىڭ قازىرگى جاعدايىن زەردەلەمەكپىز, – دەيدى كوميتەت ءتورايىمى.
ىشكى ىستەر ءمينيسترى ەرلان تۇرعىمباەۆ حالىق قالاۋلىلارىنا ماڭىزدى كەزدەسۋ ءۇشىن العىس ءبىلدىرىپ, ۇلتتىق ۇلاننىڭ ءىىم-ءنىڭ قۇرىلىمدىق ءبولىنىسى ەكەنىن جانە نەگىزگى مىندەتى قوعامدىق ءتارتىپ پەن قاۋىپسىزدىكتى قامتاماسىز ەتۋ, ستراتەگيالىق نىساندار مەن قىلمىستىق-اتقارۋ جۇيەسىنىڭ مەكەمەلەرىن كۇزەتۋ بولىپ تابىلاتىنىن ايتىپ ءوتتى.
كوميتەت قۇرامىن قۇقىقتىق ءتارتىپ اسكەرىنىڭ بۇگىنگى احۋالىمەن جانە دامۋ پەرسپەكتيۆالارىمەن كەڭىرەك ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆ تانىستىردى.
قارجى ۆيتسە-ءمينيسترى تاتيانا ساۆەلەۆا ۇلتتىق ۇلاندى رەسپۋبليكالىق بيۋدجەت شەڭبەرىندە ماتەريالدىق قامتاماسىز ەتۋ ماسەلەلەرىنە توقتالدى.
ايگۇل قۇسپان پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ كوشپەلى وتىرىسىن قورىتىندىلاي كەلە, وتىرىس بارىسىندا ۇلتتىق ۇلان قىزمەتىنىڭ ماسەلەلەرى بويىنشا تۇشىمدى ديالوگ ورناعانىن اتاپ ءوتتى.
– وتىرىس قورىتىندىسى بويىنشا ءبىز ءتيىستى ۇسىنىمدار جوباسىن ازىرلەپ, جاقىن ارادا ونى ۇكىمەتكە جولدايتىن بولامىز. ال ءوز تاراپىمىزدان, كوميتەت دەپۋتاتتارى الداعى ۋاقىتتا دا ۇلتتىق ۇلان قىزمەتىنە قاتىستى ماسەلەلەردى ەرەكشە باقىلاۋدا ۇستايتىنىن مالىمدەيمىز, – دەدى كوميتەت ءتورايىمى.
ۇلتتىق ۇلاننىڭ جەدەل جانە ارنايى اسكەري بولىمدەرى مەن بولىنىستەرى ىشكى ىستەر ورگاندارىمەن بىرلەسىپ, ەلىمىزدىڭ 19 قالاسىندا قوعامدىق ءتارتىپتى قامتاماسىز ەتەتىنىن اتاپ وتكەن ءجون.
كۇن سايىن ۇلتتىق ۇلاننان 5000-نان اسا اسكەري قىزمەتشى ءىىم بىرگە پاترۋلدىك قىزمەت اتقارۋعا جۇمىلدىرىلادى.
اعىمداعى جىلدىڭ وزىندە ۇلتتىق ۇلاندىقتار ەكى مىڭنان اسا قۇقىق بۇزۋشىنى قۇرىقتاپ, ىشكى ىستەر ورگاندارىنا جەتكىزدى. قۇقىق بۇزۋشىلىقتاردىڭ 90-نان استامى قىلمىستىق سيپاتقا يە. اسكەري جاساقتار كۇشىمەن 10 سۋىق جانە اتۋ قارۋى تاركىلەندى, سونداي-اق ەسىرتكى زاتتارىن تاركىلەۋدىڭ 14 فاكتىسى تىركەلدى.