پاۆلودار تۇرعىندارى قالا كوشەلەرى مەن قوعامدىق ورىندارداعى قار مەن مۇزعا قاتىستى نارازىلىقتارىن ءبىلدىردى, دەپ حابارلايدى Egemen.kz Polisia.kz سايتىنا سىلتەمە جاساپ.
ناۋرىز كوكتەم ايى سانالعانىمەن, پاۆلودار ءوڭىرى ءۇشىن سۋىق, قارلى, بوراندى كەزەڭ بولىپ تابىلادى. اسىرەسە بوراندى كۇندەرى اۋلالاردى, جولداردى, اللەيالاردى قار باسادى. سوندىقتان دا پاۆلودار وبلىسىنىڭ پوليتسەيلەرى ەلدى مەكەندەردىڭ تازالىعى مەن جەرگىلىكتى تۇرعىندار مەن كاسىپكەرلەر تاراپىنان اباتتاندىرۋ ەرەجەلەرىن ساقتاۋعا ەرەكشە كوڭىل بولەدى.
– 2021 جىلدىڭ باسىنان باستاپ وبلىستا اباتتاندىرۋ ەرەجەلەرىن بۇزۋدىڭ 1130-دان استام دەرەگى انىقتالدى. بارلىق قۇقىق بۇزۋشىلار قر اقبتك-ءنىڭ 505-بابى(قالالار مەن ەلدi مەكەندەردiڭ اۋماقتارىن اباتتاندىرۋ قاعيدالارىن بۇزۋ, سونداي-اق قالالار مەن ەلدى مەكەندەر ينفراقۇرىلىمى وبەكتىلەرىن بۇزۋ, جاسىل ەكپەلەرىن جويۋ جانە ءبۇلدىرۋ) بويىنشا اكىمشىلىك جاۋاپكەرشىلىككە تارتىلدى, – دەدى پاۆلودار وبلىسى پد جەرگىلىكتى پوليتسيا قىزمەتى باسقارماسىنىڭ باستىعى عالىم سارعۇلوۆ.
ونىڭ ايتۋىنشا, اتالعان باپقا سايكەس وسىنداي قۇقىق بۇزۋشىلىقتار ەسكەرتۋ جاساۋعا نەمەسە 300 ايلىق ەسەپتىك كورسەتكىشكە دەيىن ايىپپۇل سالۋعا اكەپ سوعادى. ماسەلەن, وسىنداي فاكتىلەر 8 ناۋرىزدا انىقتالدى. ساعات 11.00 شاماسىندا پب كەزەكشى بولىمىنە ەستاي كوشەسىندەگى ءۇيدىڭ جانىندا ورنالاسقان مينيماركەتكە كىرۋ قار مەن مۇزدىڭ تازارتىلماۋىنا بايلانىستى مۇمكىن ەمەس ەكەنىن, سونىڭ سالدارىنان اربامەن جۇرە المايتىنىن ايتىپ قالا تۇرعىنى حابارلاستى.
اتالعان مەكەنجايعا كەلگەن پوليتسەيلەر دۇكەن ديرەكتورىنا قاتىستى قر اقبتك-ءنىڭ 505-بابى بويىنشا اكىمشىلىك حاتتاما تولتىردى. وعان ەسكەرتۋ جاسالدى. دۇكەننىڭ جانىنداعى قار مەن مۇز قىسقا ۋاقىتتا تولىعىمەن تازارتىلدى. ءدال سول كۇنى پوليتسياعا وسىعان ۇقساس تاعى ءبىر قوڭىراۋ كەلىپ ءتۇستى. قالا تۇرعىنى تورايعىروۆ كوشەسىندەگى دۇكەننىڭ جانىنداعى جولدىڭ تايعاق ەكەنىن حابارلادى.
– وندا ءجۇرۋ وتە قاۋىپتى, تايىپ كەتۋ جانە قۇلاۋ قاۋپى بار. دۇكەنگە قارت ادامدار مەن بالالار دا كىرەدى, – دەپ شاعىمداندى ەر ادام. ءتارتىپ ساقشىلارى بۇل فاكت بويىنشا دا اكىمشىلىك حاتتاما تولتىرىپ, دۇكەن يەسىنە ەسكەرتۋ جاسادى.
بۇدان باسقا, پوليتسيا قىزمەتكەرلەرى ۇيىم يەلەرىن, جەكە كاسىپكەرلەردى سانالى بولۋعا, ىرگەلەس اۋماقتاردىڭ تازالىعىن قامتاماسىز ەتۋگە جانە قالا تۇرعىندارىنىڭ جاۋاپكەرشىلىگى مەن قاۋىپسىزدىگىن ەستە ساقتاۋعا شاقىرادى.