قازاق ءباسپاسوزىنىڭ قاتارى تاعى ءبىر جاڭا گازەتپەن تولىقتى. قاراعاندى قالاسىنان «Qaraǵandy habary» اپتالىق گازەتى 4 ناۋرىز كۇنى العاشقى سانىن شىعاردى. ايتا كەتەيىك, جاڭا باسىلىمنىڭ تۇڭعىش ءنومىرى قوعام قايراتكەرى ءاليحان بوكەيحان ۇلىنىڭ تۋعان كۇنىنە وراي جاريالانىپ وتىر.
«كەنت» باسپاۇيىنە قاراستى قالالىق قوعامدىق-ساياسي اپتالىقتىڭ نەگىزگى قۇرىلتايشىسى – مەتسەنات باقتىباي ءجۇنىسوۆ. باس رەداكتورى – ءلاززات قوجاحمەت. جاڭا گازەت 8-12 بەت ارالىعىندا ايىنا ءتورت رەت باسىلىپ شىعادى. ال تيراج سانى 10 000 داناعا دەيىن كوبەيتىلمەك.
وسى ۋاقىتقا دەيىن قاراعاندىدا بىردە-ءبىر قازاقتىلدى قالالىق گازەت بولعان جوق. ءتىپتى, بۇل ماسەلە تالاي رەت قوعامدىق تالقىعا تۇسكەن بولاتىن. قاراعاندىلىقتاردىڭ كوپتەن كۇتكەن قۋانىشتى جاڭالىعىنىڭ ءمان-جايىن ءباسپاۇي قۇرىلتايشىسى باقتىباي جۇنىسوۆتەن سۇراپ كوردىك. «بىردە جىگىتتەر «كاراگاندينسكيە ۆەستي» گازەتىنىڭ قازاقشا نۇسقاسىن شىعارۋ يدەياسىن ۇسىندى. ويتكەنى, 500 مىڭنان استام حالقى بار قاراعاندىنىڭ قالالىق گازەتى جوق ەدى. اقىلداسا كەلە وسى «Qaraǵandy habary» اپتالىعىن شىعارا باستادىق. ء«تىل – التىن كوپىر» دەگەن دانا حالقىمىز. جالپى, كەز كەلگەن باسىلىمنىڭ نەگىزگى مۇراتى – انا ءتىلىمىزدىڭ كەڭىستىگىن كەڭەيتۋ بولسا كەرەك. جاڭا گازەتىمىز دە وسى يگى ماقساتتا جۇمىس ىستەمەك», دەدى مەتسەنات. ايتا كەتەيىك, ءدال وسى «كەنت» باسپاۇيىنەن «ارقا اقشامى» وبلىستىق گازەتى شىعىپ كەلەدى. بۇل – ءبىراز ۋاقىت بۇرىن كوبىنەسە ورىس اقپارات قۇرالدارى شىعىپ تۇرعان قاراعاندى ءباسپاسوزى بۇگىندە قازاقىلانىپ جاتقاندىعىنىڭ بەلگىسى.
قازاق رۋحانياتىنىڭ ايدىنىنا ەندى قوسىلعان جاڭا باسىلىمنىڭ وقىرمانى كوپ بولسىن دەيمىز.