التىنبەك نۋح ۇلى ناۋرىز مەرەكەسىن تويلاۋ كۇندەرىندە ەلگە ورالعان قانداستاردىڭ وتباسىلارى مەن باسقا ەتنوس وكىلدەرىنە قازاقستاندىق پاسپورتتى سالتاناتتى تاپسىرۋ ءراسىمىن داستۇرگە اينالدىرۋدى ۇسىنىپ وتىر. بۇل تۋرالى دەپۋتات ۇكىمەتكە جولداعان ساۋالىندا ايتتى, دەپ حابارلايدى Egemen.kz.
التىنبەك نۋح ۇلى ءاز ناۋرىزدى تويلاۋعا قاتىستى بىرنەشە ۇسىنىسىن جاريا ەتتى. سەنات دەپۋتاتى ەرىكتىلەردىڭ بەلسەندى قاتىسۋىمەن وتەتىن «ناۋرىز مەيىرىمى» جالپىۇلتتىق اكتسياسى سەكىلدى شارالارىنىڭ ماڭىزىن اتاپ ءوتتى.
دەپۋتاتتىڭ پىكىرىنشە, ناۋرىزدىڭ يدەيالىق مازمۇنىن بالالار مەن جاستار اۋديتورياسىنا الەۋمەتتىك جەلى جانە وزگە دە كەڭىستىكتەگى شارالار ارقىلى ءسىڭىرۋدىڭ ءمانى ايرىقشا.
سەناتور ءوز ساۋالىندا ۇلتتىق قۇندىلىقتاردىڭ ناسيحاتى مەن رۋحاني دامۋ, مەملەكەتتىك ءتىلدىڭ مارتەبەسىن ارتتىرۋ تاقىرىبىنداعى وزەكتى ويلارىن ورتاعا سالدى.
«زامان تالابىمەن ۇندەسەتىن بۇقارالىق شارالاردى وسكەلەڭ ۇرپاققا, قاستەرلى وتانىڭ مەن وتباسىڭا, تۋعان توپىراعىنا سۇيىسپەنشىلىكپەن ناسيحاتتاۋ ماڭىزدى. سول ءۇشىن جاس ۇرپاققا ەكولوگيالىق تاربيە بەرۋ ءۇشىن اۋماقتاردى اباتتاندىرۋ, بۇلاقتاردىڭ كوزىن اشۋ مەن اعاش وتىرعىزۋدى داستۇرگە اينالدىرۋ قاجەت. وڭتۇستىك وڭىرلەردە ناۋرىز مەرەكەسىندە جانە مۇنداي اكتسيانى قولايلى كليمات كەشىرەك كەلەتىن سولتۇستىك وڭىرلەردە كەيىنىرەك ۇيىمداستىرۋ قاجەت دەپ سانايمىز», - دەدى التىنبەك نۋح ۇلى.