قازاقستاندىق كاسىپقوي بوكسشى گەننادي گولوۆكين (41-1-1, 36 كو) ورتا سالماقتاعى IBF بەلبەۋىن جەڭىلمەگەن مەكسيكالىق بوكسشى حايمە مۋنگياعا (36-0, 29 كو) قارسى قورعايتىن بولدى, دەپ حابارلادى vesti.kz RingPolska باسىلىمىنا سىلتەمە جاساپ.
جەكپە-جەك 7 مامىر كۇنى تەحاس (اقش) شتاتىندا وتەدى. بۇل كەزدەسۋ تۋرالى ەكى بوكسشىنىڭ كومانداسى بىرنەشە اپتادان بەرى كەلىسسوز جۇرگىزىپ جاتىر ەكەن. مۋنگيا – ءبىرىنشى ورتا سالماقتاعى الەمنىڭ بۇرىنعى چەمپيونى. ول گولوۆكيننىڭ سالماعىندا ەكى كەزدەسۋ وتكىزگەن. تارقاتىپ ايتساق, مۋنگيا يرلانديالىق گەري و'سالليۆاندى كەيىن باگام ارالدارىنىڭ وكىلى تۋرەانو دجونسوندى جەڭگەن.
باسىلىمنىڭ جازۋىنشا, قازاقستاندىق بوكسشى دەمەتريۋس اندرادەمەن كەزدەسە المايدى. سەبەبى, امەريكالىق بوكسشى الداعى ۋاقىتتا مىندەتتى قارسىلاسى ليام ۋيليامسقا قارسى كەزدەسۋ وتكىزەدى. ەسكە سالايىق, گولوۆكين ءوزىنىڭ سوڭعى كەزدەسۋىن جەلتوقسان ايىندا اقش جەرىندە وتكىزىپ, پولشالىق كاميل شەرەمەتانى (21-1, 5 كو) نوكاۋتپەن جەڭدى. وسى كەزدەسۋدە قازاقستاندىق بوكسشى الەم چەمپيونى اتاعىن 21 رەت قورعاپ, رەكورد ورناتتى.